IA-p siulittaasuatut Kuupik qinigaaqqissaaq
IA-p ataatsimeersuarnissaani partii siulittaasumik qinersissaaq. Siulittaasumut issiasumut Kuupik Kleistimut suli unammillertoqanngiaq
Inuit Ataqatigiit sapaatip akunnerata naanerani Sisimiuni ataatsimeersuarnerani siulittaasumik qinersinissaq - toqqaaqqinnissarluunniit - imaasiallaannaq pissagunarpoq.
Taamaasilluni siulittaasoq issimasoq Kuupik Kleist siulittaasumik qinersinissami, sapaatiuppat nalunaaqutaq 13 kulturip illorsuani Taseralimmi pisussami, suli unammillerteqanngilaq.
- Pinngisaannartoqartussamik oqartoqanngisaannassaaq, maannakkulli unammillertoqanngimmat takujuminaatsippara Kuupik Kleistip siulittaasutut qinigaaqqinnginnissaa, Inatsisartunut ilaasortaq IA-llu siulersuisuunerini ilaasortaq Naaja Nathanielsen oqarpoq.
Unammillerusuttorli ataaseq arlallilluunniit qinigassanngortinnissaminnut suli periarfissaqarput, tassa qinersinissaq tikivillugu Kuupik Kleist unammillerneqarsinnaammat.
Ataatsimeersuarnissaq sioqqullugu siulersuisuunerit ataatsimiissapput
Sisamanngorpat IA-p siulersuisuuneri ataatsimiissapput ataatsimeersuarnissaq sioqqullugu, ataatsimeersuarnissarlu aallartissaaq tallimanngorpat nalunaaqutaq 14 Taseralimmi sapaatiuppallu unnukkut naassalluni.
- Siulersuisuunerit ataatsimiinneranni ataatsimeersuarnissamut atatillugu kingulliit pilersaarusiorlugillu misissussavagut, aammalu siulittaasup nalunaarutaa tusaassavarput immitsinnullu ilassilluta, Naaja Nathanielsen Sermitsiaq-AG-p aallartitaanit Hotel Sisimiuni ataatsimiinnissaq sioqqullugu apersorneqarluni oqarpoq, ataatsimiinnissarlu taanna tusagassiortunut matoqqavoq.