Skip to main content

Nunatsinni nerisaqarnermik siunnersortit siullersaat

Michala Bagge Hansenip marlunngormat kalaallinit siullersaalluni nerisaqarnerup peqqissutsillu imminnut atanerat pillugu siunnersortitut ilinniarnerminik naammassivoq  

Ukiut pingasut affarlu ilinniareerluni Michala Bagge Hansen marlunngormat nerisaqarneq peqqissuserlu pillugu professionsbacheloritut naammassivoq klinisk diætetik immikkut ilisimasaqarfigalugu. Ilinniarnermini qaffasinnerpaamik angusivoq.  

- 12-rpunga, Michala Bagge Hansen Nuummi inunngorlunilu peroriartorsimasoq nuannaarluni oqarpoq.

- Angusarissaarluni soorunami nuanneqaaq, ingammik ilungersorsimaqaluni, Michala Bagge Hansen ilinnialerniarluni erninilu 2009-mi Nuummiit Københavnimut nuussimavoq oqarpoq. 

33-nik ukiulik Michala ilinniaqqinniarluni pilersaaruteqarpoq, tamannali pitinnagu suliffeqarnikkut misilittagaqalerniarluni suliniarluni. 

Periarfissat arlaqarput
- Ilinniarnerit sumut atussaviuk?

- Klinisk diætistitut akuersissuteqartut ingammik peqqinnissaqarfinni sulisarput, inuit napparsimasut nerisaqarnikkut katsorsarlugit inooriaaseqarnerminnut atatillugu nappaatillit soorlu sukkornermik. Aammali utoqqaat illuini utoqqaat oqippallaartut nerisaqarnikkut katsorsarneqartarput, Michala Bagge Hansen nassuiaavoq, nangillunilu soorunami inuit peqqissut aamma ikiorneqartartut nerisaqariaatsiminnik allannguerusuttut.

- Periarfissarpassuupput. Ilaat namminerisaminnik klinikitaartarput inuit nerisaqarnikkut siunnersorlugit, oqarpoq. 

Ilinniartitaaneq nuannersoq
Michala Bagge Hansen Københavns Universitetimut qinnuteqalersaarpoq ukiuni marlunni kandidatinngorniarluni. 

- Qinnuteqarniarpunga kisianni imaassinnaavoq tigusaanngitsunga ilisimatusarfimmi ilinniartunik 25-iinnarnik tigusisinnaavoq. Misilittariaqarparali, Michala Bagge Hansen oqarpoq, inuusuttullu peqqinnissanik nerisaqarnermillu soqutigisallit taamaattumik ilinniarnissaannik kajumissaarlugit.

- Ilinniarneruvoq nuannerluinnartoq, allanut innersuukkusunnartoq, inunnik, perorsaanermik, ingerlatitseqqiinermik pinngortitalerinermillu nuannarisaqartunut, Michala Bagge Hansen nunatsinni inuiaqatigiinni ilinniakkaminik atuerusuttoq oqarpoq. 

- Misilittagaqaqqaarusuppungali, oqarpoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER