Qaqortumi ilinniartut atisanik takutitsinissamut piareerput
Qaqortumi januaarip 26-ani unnuk kulturisiorfimmut atatillugu Niuernermik Ilinniarfimmi ilinniartut ilinniartitsisullu Narsamilu katersugaasivik atisanik qangarnisaanerusunik takutitsissapput
Suut tamarmik iluatsippata arfininngornermi januaarip 26-ani Qaqortumi unnuk kulturisiorfimmut atatillugu atisanik takutitsineq kusanartoq nalinginnaanngitsorlu Qaqortumi innuttaasunit qilanaarineqarsinnaavoq.
Niuernermik Ilinniarfimmi HH2 a+b-mi ilinniartut ilinniartitsisullu Narsami Katersugaasivik suleqatigalugu atisanik takutitsinermik aaqqissuuniarput.
Niuernermik ilinniarfimmi ilinniartitsisut Rie Oldenburg aamma Ida Julie Andersen naapertorlugit oqaluttuarisaanermi atisanik takutitsineq pineqarpoq.
- Atisanik 1950-70-ikkunneersunik takutitsisoqassaaq, atuaqatigiilli arnat atisaannik amerlanernik atorusuttorujussuupput: Nylonkjolinik, annoraaminernik qalipaatigissaartunik allaqarluartunillu, nangernik tunguusanik - taamanikkornisanik tamanik - inersimasunut naammattumik angissusilinnik. Tamakkuninnga peqartoqarpat NI-mit tusarfigerusuttorujussuuavut, ilinniartitsisut taakkua marluk kaammattuipput.
Atisanik takutitsineq kingusinnerusukkut aaqqissuussinissamut qilanaartuutaavoq, ilinniartut illoqarfimmi atisaarniarfiit suleqatigalugit 2013-imi upernaakkut atisarineqartussanik takutitsiumaarmata. Aaqqissuussinernit sinneqartoorutit HH2-mi ilinniartut paasisassarsiorlutik angalanissaannut atorneqassapput.
Atisanik takutitsineq Niuernermik Ilinniarfimmi atuartitsinermut attuumassuteqarpoq.
- Atuartitsinermi ilaatigut atisat, nujalerineq, tarngutit, taskit nipilersukkallu atortarpavut. Tamakkua aamma oqaluttuarisaanermut tunngasuusinnaapput ilinniartunullu soqutiginaateqarsinnaallutik. Atuartitsineq uummaarinnerulersinniarlugu oqaluttuarisaanermeersunik sapinngisamik atuilluarniartarpugut, ilaatigut aamma inunnik piffissamik tamatuminnga eqqaamasaqartunik, Rie Oldenburg aamma Ida Julie Andersen oqaluttuarput.