Skip to main content

Aatsitassarsiornermik suliffissuaqarneq niuernerpalaartumik tunngaveqartoq

Naalakkersuisut Danmarkimi naalakkersuisut peqatigalugit Danmarkimi Kalaallit Nunaannilu inuussutissarsiortut suleqatigiissinnaanerannut periarfissanik qulajaasussamik pilersitsigaluartut aatsitassarsiornermik suliffissuaqarneq niuernerpalaartumik tunngaveqarluni ingerlanneqassaaq

Naalakkersuisut siulittaasuat Kuupik Kleist Københavnimi ulluni makkunani ulapippoq. Siulittaasoq naalakkersuisunullu ilaasortat arlallit sapaatip-akunnerani kingullermi Københavniliaramilli ataatsimeeqattaartuarsimapput. Ministeriuneq Helle Thorning-Schmidt ministerillu attuumassuteqartut arlallit kiisalu Danmarkimi partiit siulittaasui, kattuffiit suliamullu ilisimasaqartut assigiinngitsut ataatsimeeqatigaat. Tamatuma saniatigut nunat arlallit Københavnimi aallartitaannik ataatsimeeqateqarput. 

Danmarkimi naalakkersuisunik Folketingimilu partiit siulittaasuinik oqaloqateqarnermi suliniutinut angisuunut inatsit Danmarkimi nunanit allaneersunut inatsisip naleqqussarneqarnissaa eqqartorneqangaatsiarput.

Aatsitassarsiornermik suliffissuaqalernissami Danmarkimi Kalaallit Nunaannilu inuussutissarsiortut suleqatigiinnissamut periarfissaannik qulajaasussamik suleqatigiissitaliornissaq Kalaallit Nunaanni Danmarkimilu inuussutissarsiornermut naalakkersuisoqarfimmit ministereqarfimmillu isumaqatigiissutigineqarpoq, tamatuma saniatigut Københavnip universitetia Ilisimatusarfillu suleqatigiissitamik assingusumik suliaqartussamik inuttalersuiniarput.

Salliutitsisoqanngilaq

- Minik Rosingilu marluulluta novembarimi Politikenimi isumaliutersuummik allaaserisaqareerluta Kalaallit Nunaanni aatsitassarsiornermik suliffissuaqalersinnaanermut Danmarkimi suliffeqarfiit aningaasaateqarfiillu aningaasaliisartut soqutiginninnerulersimapput. Tamanna nuannaarutigiinnartussaavarput, Kuupik V. Kleist Sermitsiaq.AG-mut oqarpoq.

- Aamma suleqatigiissitamik suleqatigiinnissamut periarfissanik qulaajaasussamik peqatigiilluta pilersitsinissatsinut Danmarkimi naalakkersuisut soqutiginninnerat nuannaarutigaara. Kisianni erseqqissaatigissavara, aatsitassarsiornermik suliffissuaqarneq nalinginnaasumik niuernerpalaartumik tunngaveqarluni ingerlasariaqartoq arlaannaalluunniit salliutinneqartussaanngitsoq, siulittaasoq erseqqissaavoq.

- Suleqatigiissitamut suliassat piffissami qaninnermi suliarineqassapput, suleqatigiissitallu inassuteqaatiminik inaarsaanissamut piffissamik qanoq sivisutigisumik atuinissaa aalajangiivigineqassaaq, Kuupik Kleist Sermitsiaq.AG-mut oqarpoq.

Immikkut ilisimasallit
Naalakkersuisunit siunnersuisartut pilersikkumaneqartut allat tassaapput akileraartarnermut tunngasuni siunnersuisartut nunanit tamalaaneersunit inuttaqartussaq, Kalaallit Nunaata suliffeqarfissuarnit Kalaallit Nunaanni suliaqalersussanit akileraartarnikkut uukapaatinneqannginnissaanik qulakkeerinnittussaq.

Aningaasaqarnermut naalakkersuisoq Maliina Abelsen erseqqissaalluni oqarpoq, suliffeqarfiit akileraarusersorneqarnerisa nunallu tamalaat akornanni aatsitassarsioqatigiiffinnik uuliasioqatigiiffinnilu Kalaallit Nunaannut kajungilersitsiniarnerup akornanni oqimaaqatigiissitsinissaq nassaariniarneqartariaqartoq.

- Kattuffinnik suliamullu ilisimasaqartunik assigiinngitsunik suleqatigiissitamik nunat tamalaat akornanneersunik immikkut ilisimasalinnik aatsitassarsiornermi oqimaaqatigiissitsinissamik nassaarniarfiusussami Kalaallit Nunaata inuiaqatigiit aningaasaqarneranni qanoq pitsaanerpaamik iluanaaruteqarsinnaaneranik Kalaallit Nunaannut ingerlaavartumik nalilersuisarlunilu siunnersuisartussamik qanoq pitsaanerpaamik inuttalersuisinnaanitsinnik siunnersuuteqarsinnaasunik ataatsimeeqateqaqattaarpugut, Maliina Abelsen Sermitsiaq.AG-mut oqarpoq.

- Ilaatigut aatsitassarsiornermik suliffissuaqarneq aallartissavarput, tassami Kalaallit Nunaat suli nassaassaanngitsunik akileraarusersuisinnaanngilaq, kisianni tamatuma peqatigisaanik akileraartarnermi pissutsinik aallartitaqariarutta Kalaallit Nunaannut annerpaamik iluanaaruteqartitsisussanik qulakkeerinninniassaagut, Maliina Abelsen oqarpoq.

Naalakkersuisut siulittaasuat Kuupik V. Kleist sisamanngorpat Nuummut tikissaaq, ualikkullu Hans Egedep Illuani ukiortaami ilasseqatigiissitsissalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER