Ammarsarfiit sivitsorneqarnissat siunnersuisoqatigiit ajuusaarutigaat

Imigassaq ikiaroornartullu pillugit Siunnersuisoqatigiit imigassamik aalakoornartumik tuniniaanerup sivitsorneqarnissaa akaarivallaanngilaat

Assi: Leiff Josefsen

Imigassaq ikiaroornartullu pillugit Siunnersuisoqatigiit ajuusaarutigaat ukiaq manna Inatsisartunit aalajangiunneqarmat imigassamik aalakoornartumik tuniniaanerup sivitsorneqarnissaa, taamaasilluni imigassamik tuniniaaneq nal. ak. pingasunik sivitsorneqassaaq tallimanngornerni nal. 21.00 tungaanut ammasassagamik, arfininngornernilu nal. 21.00 tungaanut ammatillugit tuniniaaneq nal. ak. arfineq-pingasunik sivitsorneqassalluni, inatsit atuutsilerpat.

- Siunnersuisoqatigiit innersuussutertik ingerlatinngilaat innuttaasunik nakkutilliisuujumanatik imaluunniit innuttaasut namminneq naliliisinnaassusaannik akornusiiniarlutik. Innersuussut tunniunneqarpoq inuiaqatigiinni sanngiinnerpaat illersorniarlugit pingaartumik meeqqat inuusuttuaqqallu. Imigassamik ajornartorsiuteqarneq ilaqutariinni tarnikkut timikkullu eqquisarpoq, Inuk L. Bourup-Nielsen Imigassaq ikiaroornartullu pillugit Siunnersuisoqatigiinnit oqarpoq.

Meeqqat toqqaasinnaanngillat
- Meeqqat inuusuttuaqqallu namminneq toqqaasinnaanngillat sumi alliartussallutik aamma ajornartorsiutinut imigassamik ikiaroornartumillu atuinerup kingunerisaannut namminneq illersorsinnaanngillat. Atornerluisoqartillugu meeqqat inuusuttuaqqallu toqqissisimasunik avatangiiseqartinneqarneq ajorput. Taakkua ilinniarsinnaanerat, peqqissusaat ulluinnarnilu atugaat ajortumik sunnerneqartarput, inersimasutut inuunerannut allaat sunniuteqartarlutik.

- Ilumoorpoq, ukiuni qaangiuttuni Kalaallit Nunaannut imigassamik eqqussuinerup annikilliartornera. Tamanna nuannaarutigaarput aamma Inatsisartunit qujarunneqarpoq. Kisiannili imaanngilaq ullumikkut imigassamik atornerluinermit ajornartorsiutit annikillisut, Inuk L. Bourup-Nielsen naqissusiivoq.

Politikkikkut ersernerluttoqartoq?

Taanna oqarpoq Kalaallit Nunaanni aalakoorniarluta imeriaaseqartugut. Amerlasuut aalakoorniarlutik imertarput, imminnut aqussinnaajunnaarlutik tamatumalu nassataanik ajunaarnerit, persuttaanerit pinngitsaaliinerillu pisarlutik.

- Akisussaassusilimmik imeriaaseqarnermut ilaavoq siumoortumik aalajangersinnaaneq qaqugu qanorlu annertutigisumik imernissaq tamatumalu nassataanik ammasarfiit atuuttut naapertorlugit niuerniarnissamik pilersaaruteqarnissaq, Inuk L. Bourup-Nielsen, tikkuaavoq tamatuma saniatigut apeqquteqarluni imigassamik aalakoornartumik tuniniaanerup sivitsorneqarneratigut politikkikkut ersernerluttoqannginnersoq.

Imigassaq ikiaroornartullu pillugit Siunnersuisoqatigiinnit suliniutigineqarpoq aalakoorniarluni imeriaaseqarnerup allanngortinniarnissaa imigassamik annikitsumik atuilluni imeriaaseqarnissaq anguniarneqarluni.

Sapaatip-akunnerani AG saqqummersumi imigassaq taassumalu illuatungai saqqummiuppagut. Aviisi uani pisiariuk:

Powered by Labrador CMS