Nittaannera Nuummi timmisartoqarfimmik matusisinnaavoq

Nuummi timmisartoqarfimmi sanigutaasarsuarmik aputaajaatinik ajornartorsiorneq aamma nittaannera timmisartuussinermut akornusiisinnaapput

Nittaanera sweeperimilu ajornartorsiorneq marlunngornermi Nuup timmisartoqarfianik matusisinnaapput. Assi toqqorsivimmit: Leiff Josefsen

Mittarfeqarfiit ajuusaarutigalugu nalunaarutigaat aputaajaatit angisuup ajutoornera pissutigalugu nittaallissagaluarpat mittarfik aputaarutivinneqarsinnaanngitsoq. Maannakkorpiaq mittarfimmit aallartoqartarpoq kingusinnerusukkulli mittarfik matuneqarsinnaavoq nittaallissagaluarpat.

Tusagassiivinnut nalunaarutikkut tamanna tusarliunneqarpoq.

Timmisartumik angalasussat kaammattorneqarput www.flyinfo.gl malinnaaffigeqqullugu, imaluunniit timmisartoqarfiit nittartagaat KNR'illuunniit tekst-tv-ani qupperneq 400 - nutaanik paasissutissinneqarumasunut.

Piffissami matumanerpiaq Nuummi Timmisartoqarfimmi teknikerit ulappupput ajornartorsiummik qaangiiniarlutik, ilaatigut aputaajaatinik iluarsaassinermik aamma aaqqiissutissanik allanik nassaarniarlutik, kisiannili ajuusaarutigisamik ilimasaarutigineqarpoq sweeperimik ajornartorsiut aqagu pingasunngornermi aatsaat iluarsineqarsinnaassasoq.

Air Greenlandimit pisut malinnaaffigineqarput angalasut arlaannik ajornartorsiulinnginnissaat sulissutigineqarluni. Aallarfissat tikiffissallu malinnaaffigineqarsinnaapput www.airgreenland.gl. aqqutigalugu.

Powered by Labrador CMS