Asii Kangilinnguit atorunnaarsikkiartuaarnerat iluaraa
Kangilinnguit atorunnaarsiakkiartuaarneqarneranni ammasumik pissuseqarnissaq pillugu noqqaassuterput Illersornissamut ministereqarfimmiut tusaaniarsimammassuk nuannaarutigaara, borgmester Asii Chemnitz Narup nuannaarluni oqarpoq
- Kangilinnguit atorunnaarsiakkiartuaarneqarneranni ammasumik pissuseqarnissaq pillugu noqqaassuterput Illersornissamut ministereqarfimmiut tusaaniarsimammassuk nuannaarutigaara. Siusinnerusukkut innuttaasut peqataatinneqarnissaat pillugu Illersornissamut ministereqarfimmiut qinnuigisimavakka.
Taamak oqarpoq Asii Chemnitz Narup, Kommuneqarfik Sermersooq borgmesteri, Inuit Ataqatigiit.
Kangilinnguit atorunnaarsikkiartuaarneqarneranni Kommuneqarfik Sermersooq timitaliilluni peqataasimavoq aamma tamanut tusarniaanikkut atorunnaarsitsiartuaarnermi tamarmi ammasumik pisoqarnissaa pillugu nukippassuit atorsimavavut. Tamannalu Illersornissamut ministereqarfimmiut malissimavaat, borgmester Asii Chemnitz Narup oqarpoq.
Issittumi Sakkutooqarfiup Nuummi aallaaveqartussanngorlugu pilersinneqarnerata kingorna Kangilinnguit atorfissaarunneqarput taamaattumillu piaarnerpaamik atorunnaarsinneqartariaqarlutik.
Tassunga tunngatillugu apriilip ulluisa aallaqqaataata tungaanut tamanut tusarniaasoqassaaq. Piffissami tamatumani siunnersuuteqartoqarsinnaallunilu Kangilinnguanik tigusinissaq pillugu neqerooruteqartoqarsinnaavoq. Tamatumani Forsvarets Bygnings- og Etablissementstjeneste-imut saaffiginnittoqassaaq.
Kisianni illuuterpassuit tiguniaraanni aningaasarpassuaateqartoqartariaqartoq oqaatigineqassaaq, tassami sumiiffiup ingerlanneqarnissaannaa 20 mio. koruuninik akeqarpoq. Aamma avatangiisit pillugit pisussaaffiit piginnittunut nutaanut tunniunneqarnerisigut pituttuisuusumik pisussaaffeqartoqalissaaq, Asii Chemnitz Narup erseqqissaavoq.
Forsvarets Bygnings- og Etablissementstjeneste Kangilinnguit pillugit takussutissamik pissutsillu eqqortut pillugit nittartagaliorsimavoq. Taanna uani takusinnaavat.