Nuummi apummi sammisassat

Blok P ukiarmi isaterneqareernerata kingorna, illoqarfiup qeqqani ukiuunerani sammisassaqartitsinissamut periarfissaqalerpoq. Aallartisarnermi siulliunneqassapput ukiuunerami sammisassat

Blok P, takorluukkatsitut. Inikua meeqqat qassinilluunniit ukiullit sammisaqarfigisinnaassavaat. Assi: Leiff Josefsen

Piorsaanermut Ingerlatsivik Sanarfinermut Avatangiisinullu Ingerlatsivik immikkoortumi illoqannginnersaq pillugu suleqatigiissutiliorput. Illoqannginnersami timersuutinik arlalinnik periarfissaqassaaq, pilersaarutit marloqiusassaapput, tassa aasaanerani ukiuuneranilu pisussat.

Aallartisarnermi siullertut 2013-imi ukiuunerani sammisassat pilersaarusiorneqassapput. Tassaasut sukuutsertarfiliorneq, tassa maannakkut suliarineqaleruttorpoq, meeqqanut minnernut qamutinik sisooqattaarfik kiisalu 400 meteri ujakkaartarfik. Immikkoortoq qullilersorneqassaaq, nal. 21 tungaanut ikumatinneqartassapput, taamaalillunilu tarsereeraluartoq sammisassarititaasunik atuisoqartarsinnaassalluni.

Immikkoortup aappaa tassa aasaanera eqqarsaatigalugu,soqutiginnittut suleqatigisassallu suleqatigalugit pilersaarusiorneqassaaq. Pilersaarut maannakkut aallartisarneqaleruttorpoq.

Kommuneqarfik Sermersooq ilisimatitsivoq.

Powered by Labrador CMS