Attuumassuteqanngitsut misissuinerat KNR-p naammagisimaarpaa
Attuumassuteqanngitsut nalunaarusiaanni, ualeq manna saqqummiunneqaqqammersumi, pingaarnerusutut inerniliisoqarpoq KNR-p atugassarisani atorlugit suliassani naammassigaa
KNR-p aningaasatigut teknikkikkullu atugassarititat atorlugit suliassani naammassivai. Attuumassuteqanngitsut nalunaarusiaat, Naalakkersuisut Epinion-imut suliaritissimasaat, pingaarnerusumik taamatut inerniliivoq.
Nunatta tv-qarfiata radioqarfiatalu misissuineq naammagisimaarpaa, taallugu misissuineq tatiginartoq.
-Misissortinneq tamatigut peqqinnartuuvoq. Isumaqarpunga misissuineq kinaassusersioranilu tatiginartuusoq, tassani unammilligassavut amerlanerpaat uppernarsarneqarlutik. Qularnanngilluinnarpoq pitsanngorsaanissamut inissaqartoq. Epinion-ip inassuteqaatai tusaaniassavagut iliuuseqarfigalugillu, illullu iluani avataanilu tatiginninneq pilersinneqaqqissaaq, Ivalo Egede erseqqissaavoq.
Aningaasaqarneq aqullugu
Nalunaarusiami tikkuarneqarpoq KNR-mi aningaasaqarneq ukiorpassuarni annertuumik ajornartorsiutaasimasoq. Tamanna tupaallannarpallaarunanngilaq.
Taamaattumik Epinion-ip inassutigaa KNR-p siunissami tamanna aqulluarnerulissagaa, taamaattumillu ilaatigut inassutigalugu aallakatitassiat ataasiakkaat allaat angullugit akii naatsorsorneqartassasut. KNR naapertorlugu siulersuisut qullersallu suliniutinik arlalinnik aallartitsereersimapput aningaasaqarnerup aqunneqarnera pitsanngorsarniarlugu, tamakkualu attuumassuteqanngitsut nalunaarusiaanni inassuteqaatinut naapertuuttut.
AAMMA ATUARUK: Tamangajammik KNR-imi malinnaasarput
Teknologi-mulli nutaamut aningaasaliissuteqarnissaq suliassaavoq aaqqinneqartussaq.
Tunniussinnaasani tunniuttarpai
Atuisartunik misissuineq naapertorlugu nunami tamarmi innuttaasut amerlasuut stationeqarfiup nutaarsiassai nunatsinnilu inuiaqatigiinni tunuliaquttat isiginnaarlugillu naalaartaraat. Savalimmiunilu Kringvarp-imut sanilliussinerup takutippaa, piginnittut aningaasanut atugassaritinneqartunut naatsorsuutigineqarsinnaasunik pisartut.
- Savalimmiunisut pilersuisarpugut. Paasissutissaq tamanna pitsaasuuvoq. Tamanna atugassarisavut atorlugit uagutsinnit naatsorsuutigineqarsinnaasunut naapertuutsitseqataasinnaavoq. Nammineq isumaqarpunga maanna siumut ingerlalissasugut. KNR-mi sulisunut nunamilu maani innuttaasunut iluaqutaasumik, Ivalo Egede naggasiivoq.