S imarsiornermik qitiusumik ilinniarfik pillugu: Eqqarsaatigilluagaanngilaq

Naalakkersuisut naluneqanngitsutut ilinniarfinnik marlunnik nuusseriarlutik Nuummi imarsiornermi qitiusumik ilinniarfimmik pilersitsiniarlutik aalajangerput.

Aalajangiineq Paamiuni Imarsiornermik Ilinniarfiup Uummannamilu Piniarnermut Ilinniarfiup matuneqarnerannik nassataqassaaq.

Sermitsiaq.AG siusinnerusukkut allappoq, Ilinniartitaanermut, Ilisimatusarnermut nunanillu avannarlernik suleqateqarnermut naalakkersuisoq Palle Christiansen, Demokraatit, naapertorlugu aalajangiineq Qaasuitsup Kommunianit aamma Imarsiornermik Ilinniarfiup siulersuisuinit tapersersorneqartoq.

Isertuussineq
Siumut sinnerlugu Inatsisartunut ilaasortaq Kim Kielsen akerlianik isumaqarpoq, aalajangiineq kikkut tamaasa qulaatiinnapajaarlugit pisimasoq suliamullu atatillugu isertuussisoqapajaarsimasoq.

Naalakkersuisut 2012-imut ilinniartitaanikkut periusissiaanni siorna apriilimi tamanut saqqummiunneqartumi allassimavoq, Paamiuni Imarsiornermik Ilinniarfimmi naalaganngorniat ilinniartitaanerat tunngaviusumillu ilinniartitaaneq kiisalu Uummannami Piniarnermut Ilinniarfik Imarsiornermik Qitiusumik ilinniarfimmi Nuummi Sisimiuniluunniit inissinneqartussami Naalakkersuisunit kattutsinniarneqartut, ilinniakkallu qitiusumik ilinniarfimmi kingusinnerpaamik aggustip aallaqqaataani 2013-imi inissereersimassasut.

Læs "Nyt uddannelsessted bakkes op"

Læs "Nyt center for maritime uddannelser i Nuuk"

Akineqanngisaannartoq
Taama nalunaarneq Inatsisartunut ilaasortat ilaannit ernummatigineqalerpoq.

- Inatsisartut ilaasortaq Ruth Heilmann, Siumut, siulliulluni suliamut tunngasumik paragraf 37 naapertorlugu apeqquteqarpoq akineqarlunilu imarsiornermik ilinniakkat ataatsimoortinneqalernissaat siunnersuutigineqarsimasoq, kisianni aalajangiisoqarsimanngitsoq, Kim Kielsen Sermitsiaq.AG-mut oqarpoq.

-Kingorna uanga nammineq apeqquteqarpunga, kisiannili aallaqqaammut akineqarlunga, Paamiuni ilinniarfiup matuneqarnissaa pilersaarutigineqanngitsoq, novembarimilu apeqquteqaqqippunga, akissummilu allassimavoq Paamiuni Imarsiornermik Ilinniarfimmik matusisoqarniarneranik apeqqutikka akineqarsinnaanngitsut aalajangiisoqarsimanngimmat, Kim Kielsen oqarpoq.

Kim Kielsen taamaalilluni paragraf 37 naapertorlugu apeqqutiminut Ilinniartitaanermut Ilisimatusarnermullu naalakkersuisumit Palle Christiansenimit, ilinniarfiit taakkua marluk illoqarfinnit marlunnit nuunneqarnissaannik imarsiornermilu qitiusumik ilinniarfimmi nutaami Nuummi inissisimaffeqartumi ataatsimoortinneqarnissaannik ataasinngormat pisortatigoortumik nalunaaruteqartumit, akineqanngisaannarpoq.

Eqqarsaatigilluagaanngitsoq
Ilinniakkamik unitsitsiinnartarneq annikillisarniarlugu sapinngisamillu amerlanerpaat ilinniakkaminnik naammassinnittarnissaannik qulakkeerinninniarluni qanoq iliuuseqartoqartariaqarneranut Kim Kielsen aallaavittut isumaqataavoq.

- Periarfissanilli allanik iluamik misissueqqaaraniluunniit ilinniarfimmik nuussisoqarnissaanik aalajangerneq pissusissamisuunngilaq, Kim Kielsen uparuaavoq, ilanngullugulu oqaatigalugu, ilinniarfiup siulersuisui taama aalajangiisoqarneratigut suliassaminnik iluamik suliarinnissimanngitsut.

- Isumaqarpunga siulersuisut ilinniarfiup siulersuisuisut ilinniarfiup soqutigisaanik isumaginnittussatut akisussaaffimminnik naammassinnissimanngitsut. Siulersuisut nuussinerup aaqqiissutissatut pitsaanerpaaneranik aalajangertinnatik periarfissanik allanik iternga tikillugu misissuisariaqarsimagaluarput, Kim Kielsen oqarpoq, aalajangiiniarnermilu kikkunik tamanik akulerussuisoqaqqajarsimanngitsoq isumaqarluni.

- Naalakkersuisut Paamiuni qanoq ingerlasoqarnersoq takuniarlugu Paamiuniissimanngillalluunniit, aalajangiiniarnermilu akuutinneqartariaqarsimagaluartut tamakkeqqajaratik oqaaseqartinneqarsimapput, Kim Kielsen oqarpoq.

Qitiusumik ilinniarfissap qaqugu atorneqalernissaa, sumilu inissimaffeqartinneqarnissaa kiisalu ilinniartut inissaqartinneqassanersut apeqqutigaa.