Skip to main content

KNR TV-mi aallakaatitsiviit nutaat

DR HD peerneqareerpoq. Aallakaatitakkat arlaqartut allanngortussanngorput 

Ataasinngorpamiit januaarip 14-ani 2013-imi KNR TV’p aallakaatittagai allanngussapput. Maannangaarli isiginnaartartut DR HD nuannerineqaqisoq isiginnaarsinnaajunnaareerpaat. Aallakaatitsinerit allanngoraluarpata allanngunngikkaluarpataluunniit aasarli siunertaasimavoq kanali taanna matuneqassasoq.

- DR’p aasarli nalunaarutigaa ukiut nikinneranni DR DH matuneqasssasoq. Takusinnaasakkali malillugit kanali suli Danmarkimi ingerlavoq DR-ili naapertorlugu matuneqassaaq. Nunatsinnilu kanali taanna DTT-p aallakaatittagaanni ataasinngornermi peerneqassaaq, KNR-imi TV-mi aallakaatitanut pisortaq Jan Berg oqarpoq nangillunilu KNR-imit aalajangerneqarneq ajortoq kanalit sorliit isiginnaarneqarsinnaanersut.

- KNR aalajangiineq ajorpoq kanalit sorliit isiginnaartunit takuneqarsinnaassasut. Tamanna namminersorlutik oqartussani aalajangerneqartarpoq taakkulu Tele uagullu suleqatigaluta aalajangertarpaat kanalit sorliit akeqanngitsumik takutinneqarsinnaassanersut, Jan Berg oqarpoq.

Nammineq aallakaatitassiat amerlanerusut

Aallakaatitsinerit nutaat pilerpata isiginnaartut akeqanngitsumik kanalit makku akornanni toqqagassaqassapput: KNR1, DR1, DR2, DR Ultra (Store Ramasjang) aamma KNR2. Tassalu ataasinngorpamiit DR1 akeqanngitsumik isiginnaarneqarsinnaalissaaq KNR TV-miillu taamaattumik pisussaaffiujunnaassaaq assersuutigalugu KNR1-imi TV-Aviisip aallakaatinnissaa.

- TV-Avisen imaluunniit X-Factor, DR-imiluunniit aallakaatitat allat takorusukkaanni siunissami DR1-imut nuuttoqassaaq, peqqutigalugu KNR1-imi annerusumik nammineq aallakaatitassiat aallakaatinneqartassammata, Jan Berg oqarpoq, ilisimaaraalu nutaamik aallakaatitsisalerneq sungiunniarneqaqqaarallassasoq.

- Soorunami aallakaatitsinerit nutaat isiginnaartartunit sungiunniarneqaqqaassapput. Maannakkullu isiginnaartut namminneq aalajangersinnaalissavaat Danmarkimi aallakaatitat DR1-imi takorusunnerlugit imaluunniit KNR1-imi kalaallisut aallakaatitanik isiginnaarusunnerlutik, Jan Berg oqarpoq.

-  Unnulli naallugu aallakaatitsinissamut naammattunik aallakaatitassaqanngilagut taamaattumillu programloop atorlugu aallakaatitassiat ullup unnuallu ingerlanerani uteqattaartumik takuneqarsinnaalissapput. Neriuutigaarpulli nutaamik aallakaatitseriaaseqalernitsinni nammineq aallakaatitassiornissatsinnut nukissaqarneruleriartussasugut, Jan Berg oqarpoq.

Aallakaatitassiornermi avatangiisit nukittorsarniarpaat

Nutaamik aallakaatitseriaaseqalernermi KNR1 flow-tv-tut taaneqartartumiit niche-tv-mut sangujartussaaq.

- Flow-tv-mi isiginnaagassiat tamarmik kanalimi ataatsimi takutinneqassapput programloopeqarani, meeqqanut isiginnaagassiaqarluni, nangeqattaartunik, tv-aviisinik, allanillu isiginnaagassianik immaqalu filmimik. Niche-tv tassaaneruvoq aalajangersimasumik sammivilik, sammivik ataaseq ingerlanneqarluni KNR1-ilu niche-tv-nngoruni annerusumik nammineq aallakaatitassiaminik takusitsinerusassaaq nunallu sinneranit aallakaatitassianik pisisarluni. Qaammataasakkut internetsikkullu tv-kanalinit unammillernerujartornermi siunissami aamma pingaartuussaaq KNR TV’p namminerisaminik tunisassiortarnissaa, annerusumik kalaallisut isiginnaagassianik, Jan Berg oqarpoq.

Aallaqqaammut KNR1 ilaatigut imaqassaaq Qanorooq, Nunatsinnit, Tamassa nutaaliaasoq, inuusuttunut nipilersornermik isiginnaagassiaq Tusartaat, aallakaatitassiat nutaat quiassuarluni aallakaatitassiortunit Labrador Kangian’eersunit suliaasut meeqqanullu kalaallisut aallakaatitassat nutaat.

- Taamaaliornikkut KNR aamma nunatsinni aallakaatitassiornermi avatangiisinik nukittorsaassaaq, nutaamillu aallakaatitseriaaseqalernitsinni neriuutigaarput siunissami ima nukissaqartigilissasugut nammineerluta amerlanerusunik aallakaatitassiorsinnaalluta, Jan Berg oqarpoq nangillunilu:

- Sulili KNR1-imi nunanit allaneersunit aallakaatitassianik ataasiakkaanik aallakaatitsisassaagut, sumi tamaani imassaqarnissaq peqqutigalugu. KNR2-milu suli Inatsisartut ataatsimiinnerat aallakaatinneqartassaaq, naatsorsuutigaarpullu nunatsinni tamarmi nunanilu allani pisut aamma tassani aallakaatsittassallutigik, Jan Berg nassuiaavoq. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER