Tasiilami snowboardertartoq nersorniarneqartoq
Inuusuttoq snowboardertartoq Aputsiaq Kristensen illoqarfimmini Ukiumi Timersullammattut toqqarneqarpoq
Inuusuttumut snowboardertartumut Aputsiaq Kristensenimut ukioq 2012 angusaqarluarfiuvoq. Snowboardernermik piginnaasaqartorujussuuvoq. Kakiuisartuuvoq pikkorissoq. Timersuumminik pimoorussivoq piukkunnaatilerujussuullunilu.
Taanna siorna marsimi Canadami Arctic Winter Games-imi peqataavoq angusaqanngitsoorluni. Angusaqarusunnermik kukkusoorpoq ajoquserlunilu. Pakatsisimalluni angerlarpoq, GM-imili angusarissaaqaluni. Tamatumani arlaleriarluni nunatsinni pissartanngorpoq piginnaasaqarluarninilu takutillugu. Neriuutigaa ukioq manna GM-imi ajugaaqqittarumaarluni, aammattaarli Norge-mi DM-eqarnissaani.
Aputsiaq Kristensenip timersuunni pimooruppaa. Tasiilami majuartaat ulluinnarni paarisarpaa, namminerlu inimik sungiusartarfiliorsimavoq nukkassartarfissaminik. Timersortartoq pisassamisut nersornaaserneqartoq pimoorussisorlu.