Inuussutissarsiornermut siunnersuisoqatigiit: Paamiunut annaasaq angisooq

Paamiuni Imarsiornermik Ilinniarfiup Nuummut nuunneqarnissaanik Naalakkersuisut aalajangernerat arlalinnit naammagineqanngitsoq Sermitsiaq.AG marlunngormat allappoq.

Maannalu paasinarsivoq Imarsiornermik Ilinniarfiup matunissaanik Naalakkersuisut pilersaarutaat Sermersuumi Inuussutissarsiornermut Siunnersuisoqatigiit septembarimi 2012-imili ernumanartutut oqaatigisimagaat. Inuussutissarsiornermut Siunnersuisoqatigiit taamani Imarsiornermik Ilinniarfiup siulersuisuinut allapput ilinniarfiup matuneqarnissaa pinngitsoorniarlugu ilinniarfiup ineriartortinneqarnissaa pillugu oqaloqatiginnikkusullutik.

- Sermersuumi Inuussutissarsiornermut Siunnersuisoqatigiit Paamiuni Imarsiornermik Ilinniarfimmut takuniaasimapput. Paasivarput ilinniartut qinnuteqartut amerlassusaannit ikinnerujussuit tiguneqartartut - naak inissaqartitsisoqaraluartoq, Sermersuumi Inuussutissarsiornermut Siunnersuisoqatigiinnut siulittaasoq Martin Ben Shalmi oqarpoq.

Paamiunut annaasaq angisooq
Imarsiornermik Ilinniarfiup siunissaa septembarimili Sermersuumi Inuussutissarsiornermut Siunnersuisoqatigiinnit ernummatigineqalerpoq siulersuisullu ima allaffigineqarlutik:
- Ilinniarfiup siunissaata nalunarnera Sermersuumi Inuussutissarsiornermut Siunnersuisoqatigiinnit ernumanarluinnartutut isumaqarfigineqarpoq, ilinniarfimmi ingerlatat siulersuisoqarnikkut unikaallatsinneqarsimasutut isumaqarfiginarmata ilinniarfiullu matuneqarnissaanut tunngasunik politikkikkut oqaaseqartoqarmat. Tamanna Paamiunut angisuumik annaasaqaataassaaq.
Akerlianik Sermersuumi Inuussutissarsiornermut Siunnersuisoqatigiit isumaqarput Paamiut tassaalersinnaasoq Kalaallit Nunaanni avataasiorluni uuliasiornermi ilinniakkat aallunneqarfigisaat ineriartortinneqarfigisaallu.

Læs også: Elev: Uacceptabelt med skoleflytning

Læs også: Maritimt center: Asii beklager flytning

Akuersaarneqarsinnaanngitsoq

Ilinniagaqarniarlutik qinnuteqarsimasut 40-t tiguneqarsimannginnerat inuussutissarsiornermut siunnersuisoqatigiit siulittaasuannit allakkani taakkunanerpiaq kipiluttunartutut oqaatigineqarpoq.

- Qinnuteqartut 70-iugaluartut nuuttussaanera pillugu 30-iinnaat tigujumaneqarnerat paasisinnaanngilarput. Taava qinnuteqartut 40-t allat utaqqiinnassappat ukiorlu ilinniagaqarfiusussaagaluaq ataaseq maanngaannartillugu? Tamanna akuersaarneqarsinnaanngilaq. Atuagarsornikkut ilinniagaqalerusuttunik tapersersuinitsitulli ilinniarnertuunngorniarfimmullu killeqanngitsumik isersinnaatitsinertulli ilinniakkamik aallartitserusuttut aamma tapersersussavavut ilinniagaqalernissaannullu tapersersorlugit, Martin Ben Shalmi septembarimi oqarpoq.