Sethip iperagaanissaanik suliassaq kinguartinneqarpoq

Seth Sethsenip misiliummik iperagaanissaanik eqqartuussivimmi suliassaq ullumi nal. 9.30 pissasoq Østre Landsretip aalajangiussimagaluarpaa. Suliassarli kinguartinneqarpoq.

Taamatut Sermitsiaq.AG-mut paasissutissiivoq eqqartuussissuserisua B. Fabech-Larsen. Knguartitsineq pissuteqarpoq suliassami eqqartuussissuserisup taarserneqarsimanera.

Eqqartuussissuserisup taarserneqarnissaa Seth Sethsenip kissaatigisimaneraa paasisinnaasimanngilarput.

Seth Sethsen manna tikillugu sivisunerpaamik parnaarussaaqqasoq 1985-imi toqutsivoq, taamanikkut Albertslundimi Gammel Landevejimi taxartartoq 49-nik ukiulik Kurt Gaarn-Larsen toqukkamiuk.

Aamma atuaruk: Ukiut 26-t naammanngillat

Aamma atuaruk: Seth misiliummik iperagaassanngilaq

Arnap sikkilertup ullaakkut Kurt Gaarn-Larsen taxamini aquutaanut palulluni toqungasoq nassaaraa, motooria suli ingerlasoq. Politiit pinerluttulerisut ujajaalluni toqutsineq paasinialerpaat, taamanikkullu 31-nik ukiulik Helge Seth Sethsen Kurt Gaarn-Larsenimik ujajaalluni toqutsisimasutut unnerluutigineqarpoq.

1986-imi Københavnimi Østre Landsretimi nævningeting-imi Helge Seth Sethsen Kurt Gaarn-Larsenimik ujajaalluni toqutsisimanini pissutigalugu inuunini naallugu parnaarussivimmiittussanngortinneqarpoq. Kingorna aqqi allanngortippaa Seth Sethsen Nielsenimut.

2012-imi apriilimi, ujajaalluni toqutsinerup kingorna ukiut 26-t sinnerlugit qaangiuttut, suli parnaarussaaqqavoq, nakorsat eqqartuussinermi siunnersortaasartut suli isumaqarmata iperarneqaruni ulorianarsinnaasoq. Seth Sethsen siusinnerusukkut misiliummik iperagaanissaa itigartinneqarsimavoq, tassa nalunaarusiami ukiunik arlalinnik pisoqaassusilimmi allassimammat ulorianartoq.

Tarnimigut nutaamik misissortinnissaminut ulorianassutsiminillu nalilersinnissaminut piumasimanngilaq.

Tamanna takuneqarsinnaavoq "Drabssager i Danmark"-imi.