Politiinit ukioq pitsaanerusoq neriuutigineqartoq
Politiit neriuutigaat angerlarsimaffinni eqqissiviilliornerit tusagassiiviit aqqutigalugit ikileriartinneqarsinnaasut
Ullumi siusinnerusukkut allaaseraarput nuna tamakkerlugu angerlarsimaffinni eqqissiviilliornerit kalerriutigineqartartut amerlavallaartut aamma angerlarsimaffinni eqqissiviilliornerit politiit piffissaajaatigisaraat.
Kalaallit Nunaanni politiit 2.864-eriarlutik angerlarsimaffinni eqqissiviilliortunut ornigussimapput. Taakkunannga Nuummi 879-eriarlutik angerlarsimaffinnut orniguttariaqarsimapput, taakkunannga 456-it meerartaqartut aamma allat 113-init.
Assersuutitut taaneqarsinnaavoq Kalaallit Nunaanni angerlarsimaffinni eqqissiviilliortut 2011-mi 2.836-upput, taakkunannga Nuummi 845-t 444-t meerartaqarlutik.
Kisitsisinit taakkunannga takuneqarsinnaavoq angerlarsimaffinni eqqissiviilliornerit 2012-imi amerleriarsimasut, politiit uggoreqisaannik.
- Takorusukkaluarpara inuit ajornartorsiutaat angerlarsimaffinni eqqissiviilliunngikkaluarni anigorneqarsinnaasut taamaasilluni kisitsit nul-imut pilluni. Taanna inuiaqatigiinnut kissaataavoq anguneqarsinnaasuuppat, Nuummi politiini politikommissær Niels Nyvang oqarpoq.
Tusagassiiviit politiinik ikiuussinnaapput
- Uanga upperaara tusagassiivitsigut eqqartuisarneq inuiaqatigiinnut tamakkiisumik iluaqqutaasoq naak tusarliussaq qiimmaallannakkaluartoq, politikommissæri oqarpoq neriuuteqartoq politiit tusagassiiviit aqqutigalugit 2013-imi saqqummiussisaqattaarpata kisitsit appartinneqarsinnaasoq.
- Neriuppunga ukiup ingerlanerani arlaleriartarluta tusagassiivitsigut inuit ajornartorsiutiminnik iliuuseqartariaqartut eqqoqattaarutsigit - taamaaliorluta imigassartulersigatik ajornartorsiutiminnik aniguiniartartunngortillugit, imaluunniit inuit imilertillugit eqqarsalersittarutsigit ajornartorsiut annikillisarneqarsinnaasoq. Eqqoriarpara 100-riarluni inuit ima nipitutigisumik kamaatsillugit allaat politiinik aggersaasoqartariaqartillugu ataatsit kisimik inuit imigassartorsimanatik assortuunnerisarpaat. Angerlarsimaffinnut aggersaasarnerup ikileriarujussuarnissaa tikilluaqqorujussuarpara, Niels Nyvang oqarpoq.