Mærsk-imi pisortaq: Qallunaat aningaasaliisut naak?
Maersk Broker-imi general manager-ip Torben Ørting Jørgensenip qallunaat inuussutissarsiortut, aningaasaliisartut kiisalu inuussutissarsiornermut ministeri kajumissaarpai aatsitassarsiornermik periarfissanik Kalaallit Nunaat suleqatigeqqullugu
Qallunaat inuussutissarsiornermut ministeriat naak?
Qallunaallu aningaasaliisut naak?
Qallunaat inuussutissarsiortut Kalaallillu Nunaata aatsitassatigut suleqatigiinnginnerat taamatut Torben Ørting Jørgensenip, Maersk Broker-imi general manager-ip, apeqquserpaa.
Tamanna pivoq Berlingske-mi isumaliutissiissutikkut.
Taassuma paasisinnaanngilaa sooq namminersortut Kuannersuarni aatsitassanut qaqutigoortunut annaasaqaataasinnaasunik aningaasaliiumannginnerat.
Aamma atuaruk: Qallunaanut aningaasaliisunut Kuupik ammavoq
- Sooq qallunaat tungaannit neqeroorutiginngilarput pisortat-namminersortut suleqatigiinnissaat, tamatumani qallunaat naalakkersuisui Namminersorlutillu Oqartussat aningaasaliisut namminersortut peqatigalugit Kujataani Kuannersuarni aatsitassanik qaqutigoortunik piaanissamik suliniummut aningaasaliissuteqarlutik?
Torben Ørting Jørgensen naapertorlugu suleqatigiinneq naleqquttumik pisinnaavoq Inuussutissarsiornermut Siuariartornermullu Ministereqarfik akuleruttuliullugu "erseqqissarniarlugu pineqanngitsoq nunanut allanut inuiaalluunniit akornanni tunngasunik suleqatigiinnerunngitsoq". Ilaatigut aningaasaliisussatut tikkuarpai PensionDanmark, aammattaarli FLSmidt, aatsitassanik piiaanermik immikkut ilisimasalik.
"Qallunaat naalakkersuisuinit kalaallillu namminersorlutik oqartussaanit isumaqatigiissutigineqarpat periuseq OPP malillugu qallunaat-kalaallit selskabiannik pilersitsisoqassasoq, Kalaallit Nunaanni nunap ataani aatsitassarsiornermik ingerlatsisinnaasumik, soorunami tamassuminnga oqaloqatiginnikkusuppugut", PensionDanmark-ip pisortaa Torben Möger Pedersen oqarpoq.
Kuupik V. Kleistip 2012-imi ujartorpaa Nunatsinni pinngortitap pisuussutaanik piiaanermi qallunaat-kalaallit qaninnerusumik suleqatigiinnissaat. Isumaliutissiissut Berlingske-mi januaarip 4-aanni ilanngunneqarpoq.
P1 Orientering-imi - aamma januaarip 4-aanni aallakaatinneqartumi, qallunaat aatsitassanut aningaasaliinnginnerannik minurtsinik arfineq-marlunnik sivisussusilimmik ilanngussaqarpoq. Tassani peqataavoq Peter Damgaard Jensen, PKA-mi pisortaaneq. Aallakaatitassiaq linki una atorlugu tusarnaarsinnaavat.