Antuup Ingeniøren naqqippaa
- Tupinnaqaaq. Avatangiisinut Danmarkimik isumaqatigiissuteqarneq naammagisimaarpara, Anthon Frederiksenerseqqissaavoq
Eqqunngilaq.
Nunamut namminermut, pinngortitamut avatangiisinullu naalakkersuisoq Anthon Frederiksen Kattusseqatigiit Partiianneersoq oqarpoq atuagassiap Ingeniørenip allaaserisaa eqqunngitsuusoq.
Juullikkunni Ingeniørenimi allaaserisaqarpoq, Anthon Frederiksen avatangiisinut isumaqatigiissummik atsiorneqaqqammersumik isornartorsiuilluni, isumaqatigiissummimi Danmark pisussaaffilerneqarpoq nunatsinni sakkutooqarfiusarsimasuni saliinissamut akisussaasutut.
Allaaserisami ilaatigut allassimavoq Anthon Frederiksen isumaqartoq avatangiisit pillugit isumaqatigiissut decembarip 18-ani 2012-mi atsiorneqartoq taamaallaat siunniussanik kusanartunik imaqartoq inatsisitigulli pisussaaffiliinani.
Læs "Ingeniøren: Anthon kritiserer miljøaftalen"
Avatangiisinut isumaqatigiissut nuannaarutigaa
Sermitsiaq.AG Anthon Frederiksenimut allappoq Ingeniørenimut oqaaseqaatini nassuiaqqullugit, ullumikkullu Anthon Frederiksen oqarpoq allaaserisami oqaaserineqartut eqqortuunngitsut:
- Tupinnaqaaq. Taamatut Ingeniørenimut oqarsimanngisaannarpunga. Kukkusumik issuaaneruvoq, qulequtaa eqqarsaatigalugu. Isumaqatigiissut isornartorsiunngilara. Allaammi illersornissamut ministeri Nick Hækkerupilu ataatsimoorluta tusagassiuutinut nalunaaruteqarpugut isumaqatigiissutigalutigu isumaqatigiissut nuannaarutigalutigu, Anthon Frederiksen oqarpoq.
- Ingeniøren allappoq oqartutit isumaqatigiissut siunertanik pitsaasunik taamaallaat imaqartoq inatsisitigulli pituttuisoqarani. Eqqortuunnginnami?
- Eqqunngilaq. Avatangiisit pillugit isumaqatigiissut isornartorsiunngilara, nuannaarutigaara avatangiisinut tunngatillugu pitsaasumik pisoqalerpat. Qallunaallu isumaqatigiissutigaarput nunatsinni sakkutooqarfiusimasuni saliinissamut kikkut aningaasatigut akisussaanersut, Anthon Frederiksen oqarpoq erseqqissarlugulu Dundasimi saliinissamik isumaqatigiissut taannalu nunatsinni saliinermut saliisarnissamullu assersuutissaqqissoq.
Nunarsuaq tamakkerlugu siunnersuisarfik Niras naapertorlugu qallunaat amerikarmiullu sakkutooqarfigisimasaanni Kalaallit Nunaanni sumiiffiit mingutsinneqarsimasut 620-usut, taakkunanngalu 87-it annertuumik mingutsitsinerullutik. Nalilerneqarpoq mingutsitsinerit tamaviisa salinnissaat 1 milliard koruunit sinnerlugit akeqassasut.
Ingeniøreninimi allaaserisaq tamaat uani atuarsinnaavat.