Angutit inuusuttuaqqat tillinniarneq nassuerutigaat
Eqalugaarsunni kommunefogedip pikkorilluni suliniuteqarneratigut nukappissat marluk 14 aamma 15-inik ukiullit nunaqarfiup Pilersuisuani tillinniarsimasutut aserorterisimasutullu pisuunerminnik nassueruteqarput
Nukappissat aappaa 14-inik aappaalu 15-inik ukiullit kanngusussimassaqaat sisamanngornermut unnuakkut Eqalugaarsunni Pilersuisup pisinniarfiani tillinniarnermik aserortererujussuarnermillu nassuerutiginnittariaqaramik.
- Tillinniarneq annertujaaq eqqartorparput ilaatigut mobilinik aningaasanillu tilliffiusimasoq, politikommissær aamma immikkoortortami pisortaq Bent Ole Kleist Kujataani politiinit oqarpoq.
Politiinit suli paasineqanngilaq angutit inuusuttut marluk unnua-qeqqata kingorna qanoq pisinniarfimmut isersimanersut. Aamma suut tillinneqarsimanersut.
- Taanna maanna paasiniarparput, Bent Ole Kleist Sermitsiaq.AG.'mut oqarpoq.
- Angutit inuusuttuaqqat nalunngisasi?
- Naagga, naluagut. Qujanartumilli Eqalugaarsunni kommunefogedip sulilluarneratigut pilertortumik kikkuunersut paasivai.
Tillinniarnermi ilaatigut qarasaasiat, serveri, filmiliuutit aamma karsi aserorneqarsimapput.