Siunissami Qaarsunut timmisartuussisarneq

IA sinnerlugu Inatsisartunut ilaasortaq Isak Hammond Qaarsunut timmisartuussinerup pitsaannginneranik ernummateqarpoq

Qaarsuni mittarfik. Assi: Sermitsiaq.AG

- Qaarsunut timmisartuussinerup siunissami ajorsiartornissaanut ilimagisat aallaavigalugu ilisimatitsissutigisinnaavara Air Greenlandimit Qaarsunut timmisartuussisarnitsinnik annerusumik killilersuinissamik naatsorsuutigisaqannginnatta soorlu Kalaallit Nunaanni mittarfiit allat Dash 8-inik orninneqartakkavut taamak pilersaarfigigivut.

Taamak oqarpoq ineqarnermut, attaveqarnermut angallannermullu naalakkersuisoq Jens B. Frederiksen, Demokraatit.

Taanna akissutaavoq Inuit Ataqatigiit sinnerlugit Inatsisartunut ilaasortamut, Isak Hammond.

Hammondimip siunissami Qaarsuni mittarfimmut timmisartuussineq apeqquteqaatigaa.

- Air Greenlandimit paasissutissaatikka naapertorlugit ilaaniat aallaavigalugit timmisartuutimik sumiinnissaat aalajangertarpaat. Taannarpiaq tunuliaqutaalluni Dash 8-it Qaarsut mittarfiannut aamma ingerlaartartussat Ilulissani angerlarsimaffeqarput, Jens B. Frederiksen nassuiaavoq.

Isak Hammondip aamma apeqqutigisimavaa, qulimiguulimmik nutaamik pissarsiniarneq qanoq akeqarnersoq, tassungalu Jens B. Frederiksenip akissutigaa:

- Air Greenlandip naatsorsuutigaa qulimiguulinnik nutaanik EC 225-nik marlunnik pisinissami 400 millioner koruunit missaat atorneqartariaqartut, sungiusarnissaat atortut paarlattussaat ilanngullugit. Qulimiguulik taamaattoq 15-inik ilaasoqarsinnaavoq. Taakkununnga Dash 8-it assersuutissagaanni timmisartut 37-nik ilaasoqarsinnaapput 35 millioner koruunit missaannik akeqarlutik.

Mittarfeqarfiit naapertorlugit Qaarsuni mittarfimmik ingerlatsinermi 2010 aamma 2011-mi 6,2 millioner koruunit aamma 6,4 millioner koruunit atorneqartartut.

Powered by Labrador CMS