Skip to main content

Kuupik: Ukioq nikeriarfiusoq

- Ukioq 2012 nunatta oqaluttuarisaanerani ukiut immikkuullarissut nikeriarfiusullu ilaattut eqqaamaneqassaaq, Naalakkersuisut siulittaasuat Kuupik Kleist ukiortaami oqalugiaammini oqarpoq suliniutinut angisuunut inatsit innersuullugu   

Immiuteriikkamik oqalugiaammi marlunngornermi tv'ikkut aallakaatinneqartumi naalakkersuisut siulittaasuat Kuupik Kleist, Inuit Ataqatigiit, pingaartippaa ukiup qaangiuttup immikkuullarissut nikeriarfiusullu ilaattut eqqaamaneqassanerarlugu. 

- Ukioq 2012 nunatta oqaluttuarisaanerani ukiut immikkuullarissut nikeriarfiusullu ilaattut eqqaamaneqassaaq.

-Tassami qangarsuarli eqqartorneqartuartarsimavoq nunatta suliffissuaqarnikkut ineriartortinneqarnissaa. Tamatumali angunissaata tungaanut aqqut takisimavoq aatsaallu 2012-imi pimoorussilluni naalakkersuinikkut alloriartoqarluni. 

- Matumani soorunami eqqarsaatigaara ulloq decemberip ulluisa arfineq aappaanni inatsit nutaaq aalajangiunneqartoq, nunatsinni suliniutinut annertoorsuarnut aatsitassarsiornemilu ingerlatanut sinaakkutaasussanngortoq. Inatsisitaarnikkut nunatta pisariaqavissortumik aningaasarsiornikkut nutaanik ingerlatsiviulernissaa taamaalilluni inatsisitigut tunngavissinneqarpoq.

2025-pilersaarut, suliffissaaleqineq, aalisarneq allarpassuillu
Kuupik Kleistip ukiortaami oqalugiaammini eqqaavaa 2012 aamma ukiuusoq 2025-mut pilersaarummik Naalakkersuisut saqqummiussiffiat:” Siunissarput – illit uangalu akisussaffipput”, tassani  saqqummiuppavut siunissami Nunarput  nukittooq qanoq qulakkeerniarneripput, ilanngullugu qanoq iliorutta atugarissaarneq akissaqartittuaannarsinnaaneripput. Suliffissuarnimmi nutaanik qanorluunniit ineriartortitsitigigaluarutta  aqqissuusseqqinnissat pisariaqarput, siunissami atugarissaarnissatta akissaqartittuaannarnissaanut qulakkeerinnittussat. 

Nunatsinni suliffissaaleqineq soorunami nunami politikerit aqutsisuusoq isumagisassaraat: 

- Ungasinngitsukkut paasinarsivoq nunatsinni suliffissaaleqisut amerliartornerat kiisami uniinnarani allaat kinguariartulersimasoq. Tamanna assut nuannerpoq tusarlugu, nalunngilarpummi suliffissaaleqinerup kinguariartornera aningaasaqarniarnerup nakortikkiartorneranut tikkuutaagajuttartoq. Tamannali naammanngilaq. Suliffissat nutaat suli amigaataapput, tamakkulu pilersinniarlugit 2013-imiit suliffeqarnermut pilersaarusiarput annertusaavigalugu nangissavarput, aammalu Suliffeqarnermut Siunnersuisoqatigiit sulilersillugit. 

Naalakkersuisut siulittaasuata oqalugiaammini ilaatigut tikippai nunaateqarneq, meeqqat atuarfiat, ilinniartitaaneq, inuit peqqissusaannut tunngasut aamma aatsitassanik piiaanissaq soorlu mittarfiliornissanut umiarsualiviornissanullu aalajangiussinissanut tunngavissatut najoqqutassat, taamaaliornikkut Inatsisartut pingaarutilinnik aalajangiisinnaaqqullugit. 

 

Oqallinneq 

Ukioq ataaserpiaq matuma siorna ukiortaami oqalugiarninni eqqaamavara innuttaasut kajumissaarigut oqallinnernut akuunerusaleqqullugit. 

- Sunaaffalumi. Ukiumi qaangiuttumi inuiaqatigiit akornanni oqallittoqalaavissorpoq. Pitsaalluinnarpoq inuit taama amerlatigisumik isummaminnik saqqummiusserusuttarmata.

- Isumaqarpungali oqalliseriaatsitta allanngoriartorsimanera kisiannertaqartoq. Oqqalluni makunniunnerit ingasappallaalersimapput – pingaartumik qinikkat akornanni. Akuersaaruminaappoq naalakkersuinikkut isummersuutiginiakkat pissaaneqarniunnerup sakkortusiartortup ipitittarmagit. Akuersaaruminaappoq isummatik pissutigalugit siooratinneqartassappata. Tamakku oqallinnermut siuarsaataanngillat.  

- Ukioq manna nunatsinni politikkikkut qinigaaffiusinnaasunut tamanut qinersinissagut eqqarsaatigalugit, neriuutigeqaara qinequsaarnerni politikki pillugu qineqqusaartoqassasoq, aammalu illuatungerisat umissornissaannut ussernartorsiortarneq akiorneqarsinnaassasoq. 

- Aammali inuiattut pingaartitagut ersarinnerutittariaqarpagut, soorlu immitsinnut naligiissutut isigisarnerput, sutigut ikioqatigiiffissarsiortarnerput, immitsinnullu inussiarnersumik kiinnertarnerput.Tamakku eqqaallugit taallaq nuannarisama ilaat tusartilaarusuppara. Taallaq tassaavoq: ”Naammanngilarmi ai”,  taalliortuulluni  Frederik Kristensen, Kunngi

Naalakkersuisut siulittaasuata Kuupik Kleistip ukiortaami oqalugiaataa naqqani kalaallisut qallunaatullu atuarneqarsinnaavoq 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER