Mittarfik pillugu erseqqissumik nalunaartoqarnissaa piumasarigaa
Qaqortumi mittarfik pillugu nuna tamakkerlugu politikerit assigiinngitsunik nalunaartarnerat Kujataani borgmesterip Simon Simonsenip allatulli kipiluttunartippaa
- Ataatsimiititaliat arlariit allarluinnarmik nipeqartumik oqariartoqattaarnerat maani Kujataani innuttaasunik minnerunngitsumillu uannut borgmesterimut paatsuungatitsilerput. Siulliullutik Inatsisartut Sanaartornermut Angallannermullu Ataatsimiititaliaa, tamatumallu kingornagut Inatsisartut Aningaasaqarnermut Ataatsimiititaliaani amerlanerussuteqarluartut avammut nalunaarutigaat iikasik suligooq misissuisoqartariaqarpoq Qaqortumi timmisartunut suluusalinnut mittarfiliorsinnaanermik isummernissaq sioqqullugu.
- Ataatsimiititaliat annertuumik oqaasissaqartut oqariartuutaat aammalu Naalakkersuisunut ilaasortat siulittaasortik siuttoralugu oqariartuutigisartagaat ataatsimiititaliat pineqartut oqariartuutigisartagaannut naapertuutinngilluinnartut kialluunniit paasisinnaavai.
Taama Kommune Kujallermi borgmesteri Simon Simonsen, Siumut, oqarpoq.
Læs "Lufthavn splitter koalitionen"
Læs "D: Qaqortoq nok skal få en lufthavn"
Læs "Udvalg: Beklageligt, Jens B."
- Kommue Kujallermi borgmesteritut innuttaasut sinnerlugit kissaatigivara partiit oqaluttuuttariaqaraannga paatsiveerusimaarnersuaq qaqugu anigorniarneqarnersoq, aammalu ilumut Qaqortumi timmisartunut suluusalinnut mittarfiliorniarnermi misissuinerit suli suut ingerlanniarneqarnersut, ilami Angallanneq pillugu isumalioqatigiissitap oqariartuutai paatsoorneqarsinnaanngiluinnarmata, ilaatigut ima oqaasertaqartut: Mittarfiup Narsarsuarmi inissisimanera ingerlasussanik piareersaaneq aqutsinerlu eqqarsaatigalugu pitsaasuunngilaq, tassami angalasuni Narsarsuarmiit aallaaveqartunik tassungaluunniit tikittartunik soqanngilaq ikittuararsuullutilluunniit. Ingerlasussanik piareersaaneq aqutsinerlu pitsaanerulissappat Qaqortumi mittarfiliortoqarsinnaavoq, Simon Simonsen erseqqissaavoq.
Paaserusuppaa allatut isummersulernerup suummitaavaakua aallaavigigai, aamma sooq Naalakkersuisut Ataatsimiititaliallu sulinerat taama ataqatigiinngitsiginersoq.
Juullinngitsiartoq paasinarsivoq Qaqortumi mittarfiliornissaq pillugu naalakkersuisooqatigiit avissaartuussimasut, tamannalu tunngavigalugu naalakkersuisooqatit Inuit Ataqatigiit Demokraatinit sakkortuumik avoqqaarineqartut.