Kofoeds Skolemi kalaallisut juulliararsiorput
Aalborgimi Kofoeds Skole kalaallit juulliararsiorfigaat
Juulliaqqap unnukkuani suut tamarmik iluatsinnissaannut amigaateqartoqanngilaq kalaallit peqatigiiffiat Ikerasak Aalborgimi akeqanngitsumik juullisioqatigiinnissamut aggersaamat.
Juullip evangiliiua kalaallisut atuffassutigineqarpoq, orpik kaavinneqarpoq, Guuterput atorneqarpoq, meeqqat mamakujussaqarput, peqataasut tamarmik poortugarsipput, juullimi nerlitugassat flæskestegilu naammalluarput, risalamande poortugarsiassartalik soorunami aamma kalaallit eqqissiivillutik peqatigiinnerat meeqqat pissangasut akornanni. Ataatsimooqatigiinnermi misigisassaapput meeqqat nipaat, juullisiutit tussiutillu, atuffassineq oqaluttuarnerlu. Inuit namminneq kajumissutsitik naapertorlugit suleqataasut inuppassuarnut nerisassiorput.
Juullimi nereqatigiinnermi inuit 50 miss. inissaqarput. Inissat tamarmik siumut inniminneriigaapput peqataarusukkaluit ataasiakkaat pakatsisinneqartoortariaqarlutik.
Unnussiornissamut namminersortut ingerlatsiviillu tunisisipput juullisioqatissaqanngitsunut juulliararsioqatigiinneq akeqanngitsumik oeqataaffigineqarsinnaaqqullugu.