Europami nunanut allanut unammisartut sukataarput
Sisoraatinik oqilaniunnermi nunanut allanut unammisartut Europami piffissaq manna sungiusarput - sisorartartut arlallit unamminerni peqataapput
Kalaallit sisoraatinik oqilaniuttartuisa nunanut allanut unammisartui Nunatsinnit ungaseqisumi juulli ukiortaarlu nalliussissavaat. Katersuunneq piffissaq manna unamminernut assigiinngitsunut peqataanissaq anguniarlugu aaqqissugaavoq. Katersuunnermi matumani oqilaniuttartup ataatsip arlallilluunniit VM'imut Italiami februaarimi Val di Femme-mimi ingerlanneqartussamut anngussinnaanerannut kinguneqartinniarneqarpoq.
- St. Ulrich am Pillersee, qimaqqammerparput tassani nunanit 28-nit Europami Inuusuttuaqqat pissartanngorniunnerat peqataaffigalutigu. Kalaallit Nunaannit peqataapput Martin Møller, Karl-Peter Kristensen, Pipaluk Kristensen aamma Salik Olsen, nuna tamakkerlugu sungiusaasoq Erik Amondsen Sermitsiaq.AG.-mut oqarpoq.
- Unamminerni peqataaffigisamini tamani Martin Møller angusarissaarpoq, VM aamma World Cupimut piumasaqaatinik naammassinnittoq. Tamatuma kingunerani Tour de Ski ukiortaap missaani peqataaffigissavaa. Peqataasunut allanut oqimaassimavoq.
- Angutinut inersimasunut oqilaniuttartunut pitsaanerpaanut unammipput, soorlu siorna World Cupimut ajugaasumut Dario Cologna, allanullu qulinut nunarsuarmi pitsaanerpaanut. Tamanna St. Ulrich am Pillersee-mi pivoq, soorlu nunarsuarmi tusaamasarsuit Petter Northug peqataaffigisaani.
- Martin Møller taamaallaat 6 sekundinik kvart finalinut anngunnissaminut inortoorpoq, aallartittunit 95-init normu 71-iulluni. Naligeeqqaat naak inernerit allattorsimaffianni kingullernut ilaagaluarluni, taamaakkaluartoq angusarissaaqaaq, VM'imut aamma World Cupimut piumasaqaatit angugamigit.
- Aatsaat perngaamik peqataasumut Pipaluk Kristensenimut oqimaappoq, kingullersaalluni apuuppoq, ajugaasumit 55 sekundinik kigaannerulluni kvartfinalinut anngunnissamut 33 sekundit qaangerlugit, Erik Amondsen oqarpoq.