Juullikkunni imminut paarilluarit

Juulli meeqqat ilaqutariillu nuannaarfigigaluaraat ukiut tamarluinnaasa Nuummi nuannaarnermut aserusumik ajornerusumillu pisoqartillugu inuttut sualuttumik ajoquserneqarmik kingunersumik annerusumik minnerusumilluunniit ajutoortoqartarnera nukisitsisitigut paasissutissani takutinneqarpoq.

Taamaattorli tuppallersaatissaqarpoq.

Ajutoornerit pinaveersaartinniarlugit illit ilaquttatillu nammineerlusi annertuumik iliuuseqarsinnaavusit.

Ajutoortoqassagaluarpallu politiit, qatserisartut peqqinnissaqarfillu ilinnut ikiuunnissamut ulloq unnuarlu kaajallallugu piareersimassapput.

Nalliuttorsuit sioqqullugit nunap immikkoortuani aqutsisoq vicepolitiinspektør Janus Eigaard, upalungaarsimanermut pisortaq Knud Petersen nunallu immikkoortuani nakorsat pisortaat Jesper S. Olesen Nuuk Ugeavisip naapippai, taakkualu ataatsikkut isumaqatigiillutik oqarput, ikiuunnissamut piareersimallutik, kisianni...

– Suliarput nuannaraarput, kisianni aatsaat iluatsilluartutut oqaatigineqarsinnaalersarpoq suliaqanngikkaangatta!

Imatut paasillugu politiini, qatserisartuni peqqinnissaqarfimmilu ullut nipaatsuugaangata juulli nuannersimasartoq pinartumik pisoqarfiunani.

Kisitsisitigullu paasissutissani aamma takutinneqarpoq ajutoornerit ilarpassuini imigassaq akuusartoq.

Kalaallit Nunaanni imigassamik atuineq 1980-ikkut qiteqqunneranniilli appariartorsimavoq, kisianni imigassartornermik kulturimik ikuallattoqarneranik, ajortuliortoqarneranik ajoqusertoqannginneranillu kinguneqartumik pilersitsiniarneq sivisuumik ilungersunartumillu pisivoq.

Inuillu ilerasuutissaannik tuninngikkaluarlugit tamatta ajorata juullisiornitta anigornissaa ataatsimut akisussaaffiuvoq.

Qatserisarfimmi juulli

Nuummi juuli eqqissisimanartarpoq

Inuit orpiliarlutik julefrokosterlutillu aliannaarsaartarput, juullimullu pinnersaatini orpinnilu naneruutit alianaannermik pilersitsisarput, kisiannili pisuni ataasiakkaani aamma ikuallannermik pilersitsisarlutik, tassa naneruutit ikumasut puigorneqaraangata.

Orpik ikumasoq imermik qattameersumik kuineqarpat aamat sumut tamangaa tammikalatinneqassapput, taamaattumik allarut masattoq, naasunik imerterut imaluunniit sodavandi qappiornertalik sakkussaqqinnerupput.

– Alianartut siumoortumik pinianngikkaluarlugit ilungersunartumik pisoqaleratarsinnaanera eqqarsaatigeriissallugu isumassarsiatsialaassaaq, ajortumik pisoqarpat atortussat pisariaqartut aatsaat ujarneqaleqqunagit, upalungaarsimanermut pisortaq Knud Pedersen oqarpoq.

Juulliaqqami, Juullerujussuarmi Juullillu Ulluata Aappaani qatserisartut arfineq-marluk nal. 16-imiit ullaakkut 08-mut pigaartuusassapput, taakkualu saniatigut qatserisartunik aqqanilinnik aggersaasoqarsinnaassalluni.

2011-mi juullikkunni qatserisartut ikuallannernut marlunnut aggersarneqarput; ukiualuinnaat matuma siorna orniguttariaqartarnerit arfinilinnik arfineq-marlunnilluunniit amerlassuseqartarput.

Juulli nerisassallu pitsaasut immikkoortikkuminaapput, inuppassuillu qeerlutoortugassartik iffiorfimmiinnerani utaqqiisaa iggavimmi viinnisorujoorlutik aliannaarsaartarput, mianersortariaqarporli.

– Imigassap, igat kissartut iggavimmilu atortut ipissarluarsimasut akornanni inunnik ajoqusersimasunik peqqinnissaqarfik aamma passussisariaqartarpoq, nunap immikkoortuani nakorsat pisortaat Jesper S. Olesen oqarpoq.

Siunnersuutitsialak: Juullip kissaallaa nerrivimmut qaqinneqartinnagu iggavimmi suliassat naammasseqqaakkit.

Politiit aqqusinermi

Juulli julefrokosternerit aamma naligisarpaat, ukiullu tamaasa imigassartorsimallutik biilertunik tigusarinnittoqartarpoq.

Tamanna sianiilliornerullunilu pisariaqanngikkaluarpoq.

– Taxarit (biilersinnaanermut allagartamik arsaarneqarnermi akiligassinneqarnermiit ajoqutaasunillu tamanna akikinneerarsuuvoq) imaluunniit kina angerlamut aquttuujumaarnersoq aapparisannut isumaqatigiissutigiuk, vicepolitiinspektør Janus Eigaard kaammattuivoq.

Julefrokostit qaqugukkut sumilu pinissaaq politiinit soorunami ilisimaarineqartarpoq, biilertullu misissuiffiginiarlugit aqqusinerni immikkut sulisoqartarpoq.

Tamatuma peqatigisaanik innuttaasut isiginnittaasiat allanngorsimavoq, taamalu aalakooqaluni »angerlarniartarneq« akuersaarneqarunnaarsimalluni. Ikinngutit ilumoortut ikinngummik suleqammilluunniit imigassartorluni biilerniartumik unitsitsinissamut nangaasanngillat, kikkut tamarmik ajoratik angerlarsinnaaqqullugit.

Inuit qassit pigaartuunerat, aamma juullikkunni, politiit ilisimatitsissutigineqanngisaannarpoq, apeqqummullu Janus Eigaard ima akivoq:

– Naammassaagut.

Nuummi pisussat pillugit Nuuk Ugeavis atuaruk. Nuuk Ugeavis akeqanngitsumik uani aasinnaavat: