Tuusip Anso eqqaaniarpaa

Ane Sofie Hammekenip toquneratigut politikkikkut suliniuteqarsimasumik kingumut annaasaqarpugut, Inatsisartut siulittaasuat Josef Motzfeldt, IA, eqqaaniutaa tamakkiissoq uani ilanngutissavarput:

Namminersornerulernitta pileqqaarneraniit naalakkersuinikkut siukkat malunnaatillit ilaata suli ataatsip qimappaatigut.

Inatsisartunut ilaasortaasimasoq Illoqqortoormiunilu borgmesteriusimasoq Ane Sofie Hammeken unnuaq toqukkut qimaguppoq 73-inik ukioqarluni.

Anso Ilulissani inuuvoq, inersimasutulli inuunermi annersaa Illoqqortoormiuni najugaqarluni.

Ane Sofie Hammeken 1979-imiit kommunalbestyrelsimut ilaasortaavoq piffissamilu 1993-1997 borgmesteriulluni.

Nammineq Anso taamanikkut Inatsisartunut ilaasortaaqatigalugu ilisarisimalerpara. Anso Inatsisartunut piffissami 1989-imiit 1995-imut ilaasortaavoq. Taamanikkut Inatsisartunut ilaasortaanerata nalaani ukiut amerlanerit Inatsisartut kultureqarnermut ataatsimiititaliaata ilaasortarai Jonathan Motzfeldt siulittaasutut, Agnethe Nielsen, Emilie Lennert, Ane Sofie Hammeken uangalu sakkutuuaqqatut ilaasortaralugit. Ataatsimiititaliami ataatsimiittarnivut nuannersut eqqaamaqaakka angutit marluulluta arnat nukittuut pingasut illuatungeralugit apeqqutit kulturitsinnut tunngasut, soorlu kalaallisuut inuiaat assutaattut nalliuttorsiornerniluunniit assuutitut taaneqartassanersut, apeqqutit inuiattut pingaartitatsinnut imaluunniit kristumiuussutsip ataannartariaqarneranut tunngasut, sammigaangatsigit.

Ukioq manna maajimi Atuagagdliutinut Anso ima oqarpoq: "Illoqqortoormiuni najugaqarpunga. Maani angerlarsimaffeqarpunga, maanimiuuvunga maani ullukka naggataarumaarpakka."

Ansop qimatai qitornai arfinillit erngutai 25-t erngutaqqiutaalu 22-t eqqarsaatinniitippakka.

Anso illoqarfimmini asaqisamini eqqissivoq. Qujaniarlunga nukittussusialu mianeralugu sikiffigaara.