Juulli sioqqullugu aningaasarsisarneq suli anguniarneqartoq

- Inuiaqatigiit tamattaalluta eqqissilluta juullisiorusuppugut.

Taamak aallartippoq Siumut sinnerlugu politikkikkut oqaaseqartartoq Per Berthelsen oqallisissiami saqqummiussamini, Naalakkersuisut Siulittaasuannut Kuupik Kleist, Inuit Ataqatigiit aamma Naalakkersuisut sinnerinut qinnutigaa:

Maanna nalliuttorsuit qanilliffianni nakeriallannartumik naalakkersuisooqatigiinnit tusartinneqarpugut -aasit inuiaqatigiinnut uatsitut ikittunnguanut malunnaqisumik qanilaassuseqanngilluinnarnermik takutitsisumik ileqqutoqqanillu asuli eqqussaanikuunngitsunik qimaterisumik.

S: Siunertaqanngilaq aamma politikki inuppalaanngitsoq

Siumumit nalunngikkaluarparput maanna Naalakkersuisuusut Landskarsimi aningaasaatigut tigusaasut ukiut pingasut ingerlanerinnaanni nungukkaluttuaraat. Kisiannili Siumumit isumaqanngilagut tavannersuup kinguneranik inuiaqatigiit ilutsinni pissakilliornerullutik ulluinnarminni napaniapiloornerusut tassaassasut tamatuminnga eqqugaallutillu misillertitaasussat.

Innuttaaqatittami akornanni 40 %-it missingi ukiumut 168.000 kr.-nit ataallugit isertitaqartuupput, taakkununngalu pingaaruteqarluinnartuuvoq juullinngitsiarnerani aningaasarsiassanik "siumoor-tumik" tigususinnaasarneq. Ileqquuvoq ataqqinartumik inuiaqatigiit akornitsinni ikioqatigiinnissamik takutitsissutaasoq.

Tamannali tassa maanna naalakkersuisooqatigiissunit peerneqalerpoq, taamaammallu innuttaasut akunnitsinni inuppassuit juullimi, ilaqutariit nalliuttorsioqatigiiffissaanni amikkisaarnermik atugassaqalersinneqalissapput.

S: Inussuarnersumik kaammattuut

Siumumit nalunaarutigissavarput tamaviaarlutalu kaammattuutigiumagatsigu pissutsit taamatut ittut nunatsinnut eqquteqqunagit, taamallu pissagissaarnerusuinnarnut iluaqusiisartumik polikkernerujussuaq takussaajartuinnartoq unitseqqullugu.

Neriulluta qinnuterput inussiarnersumik tiguneqassasoq tamanut juullimi ukiortaassamilu pilluaqqusiumavugut, Per Berthelsen naggasiivoq.