Meeqqanut tapit kingumut atuuttumik pineqarnissaat sorsuutigaa

Meeqqat tapiinut inatsit kalaallinut savalimmiormiunullu atuuttoq ataasinngornermi Folketingimi aappassaaneerneqarpoq. Januaarip aallaqqaataanit ilaqutariit meeqqat tapiinik pissarsisalissapput, kisianni inatsit kingumut atuuttariaqaraluarpoq, Sara Olsvig, IA, oqarpoq

Kalaallit ilaqutariit Danmarkimi najugaqartut kingumut atuuttumik meeqqanut tapiissutinik pisariaqarput, Sara Olsvig oqarpoq. Assi: Chr. Schultz-Lorentzen

Ukioq nutaaq aallarnerfigalugu meeqqat tapii ilaqutariinnut meerartallinnut inuusuttuarartalinnullu Danmarkimiittunut Kalaallit Nunaanni Savalimmiulluunniit paarlakaajaattumik najugalinnut suliffilinnulluunniit atuutilissaaq. Tamanna erseqqissivoq ataasinngornermi Folketingimi meeqqanut tapit aamma meeqqanut tapinik siumoortumik tunniussisarnermik inatsit aappassaaneerneqarmat, meeqqanut inuusuttuaqqanullu tapit oqallisigineqarneranni.

Kisianni IA sinnerlugu folketingimut ilaasortaq Sara Olsvig kingumut kaammattuuteqarpoq inatsimmik allanngortitsinissaq kingumut atuutissasoq taamaasilluni kalaallit ilaqutariit meerartallit immikkut ittumik angisuumik meeqqanut tapinik piniassammata:

- Kaammattuutigerusuppara inunnut Kalaallit Nunaannit aamma Savalimmiunit 2012 ingerlanerani Danmarkimut nuussimasunut qanoq iliuuseqartoqarnissaa, inatsisip atuutereerfiata nalaani. Aningaasat pissarsiassaagaluit kalaallinit aamma savalimmiormiunit eqquisimappat taava tunngaviatigut inatsit kukkuneqarsimassaaq, taakkualu eqqorneqarsimasut ukioq naallugu pissaraluaminnik annaassallit taarsiiffigineqassagaluarput, Sara oqarpoq.

Tamatuma saniatigut Sara Olsvig isumaqarpoq inatsisimik allanngortitsinerup naalagaaffeqatigiinni nunat killeqarfii pillugit akorngummik peersitsissasoq:

- Killeqarfiit pillugit akimmiffik soorlu islandimit suleqatitta Nunat Avannarliiit Siunnersuisooqatigiivisa oktobarimi Helsinkimi ataatsimiinneranni saqqummiukkaat, taassumammi nunanit avannarlernit innuttaaqatitsitsinnik nunat akornatsinniittut akornanni nuunnerminni misigisarpaat. Taamaattumik kaammattuutigissavara ajornartorsiut avannaamioqatigiinnermi isiginiarneqassasoq, Sara Olsvig ullumi oqarpoq.

Meeqqanut tapit pillugu inatsit decembarip 19-ianni pingajussaanneerneqassaaq januaarip aallaqqaataani 2013 atuutilissalluni.

Powered by Labrador CMS