Oqallisissiaq: Aningaasanik isertitseriaatsit pitsaanersaat
IA-p politikkikkut oqaaseqartartua Aqqaluaq B. Egede aatsitassarsiornermi isertitseriaatsit pitsaanerpaartaannik ujartuivoq. IA ingerlarsorunarpoq atuinermullu akiliutinut akerliujunnaarsimagunarluni aaqqiissutissamillu pitsaanerpaamik tikkuussisinnaasumik siunnersuisoqatigiinnik pilersitsisoqarnissaa inassutigalugu
Aatsitassarsiorneq Nunatta aningaasarsiornikkut annertunerpaamik ataavartumillu iluaqutigissappagu, taava Nunatta aningaasanik isertitseriaatsimik pissarsinarnerpaamik nassaarnissaa pingaarnerpaajuvoq. Pingaarnerunngilaq isertitseriaaseq Royalty-mik taaneqassanersoq, akileraarummik taaneqassanersoq, imaluunniit allatut taaneqarluni atuutsinneqassanersoq. Pingaarnerpaajuvoq Nunatta inuisalu aatsitassarsiorfinniit aningaasarsiornikkut isertitaqarfiginerpaasinnaasaat nassaariniassallugu.
Periusissarli Nunatsinnut naleqqunnerpaaq nassaariniassallugu eeeqqqarsaatigilluaqqaarlugu misissuinikkut pipallataanngitsumik anguniagassaavoq. Imaalitsiaannaq tamanna pisinnaanngilaq. Inuit Ataqatigiinni isumaqarpugut aatsitassarsiortitsinermi aningaasarsiornikkut sinaakkutaritinneqartut ataavartumik nalilersorneqartuartariaqartut. Taamammat pisuussutinik uumaatsunik aningaasarsiuteqarsinnaanerput aamma nalilersuiffigineqartuartarput akuttunngitsumillu misissueqqissaarnerit ingerlanneqartassallutik. Nalilersuinerit tamakku peqqissaarunneqassasut ilisimasanillu pitsaanerpaanik tunngaveqassasut utaqqissallugit pissutissaqarpugut, eqqaamassavarpummi aatsitassarsiorfinnik nutaanik suli maannamut ammaasoqanngimmat.
Imaappoq, ullumikkut Royalty-mik imaluunniit allatut ilusilimmik pilersitsigaluaruttaluunniit aappaagu qularnaatsumik isertitassaqanngilagut, pissutigalugu - suli aatsitassarsiorfinnik nutaanik ammaasoqanngimmat. Allatut oqaatigalugu, isertitaqarnerpaaffissarput anguniarutsigu politikkikkut unammisassarput tassaavoq, siunissami aatsitassarsiorfinnik aallartitsisoqarnissaa qulakkiiutigalugu qanoq ililluta aningaasanik isertitseriaasissarput pissarsinarnerpaaq angussin-naassavarput.
Taamaammat mianersuussassaavoq Royalty aningaasarsiornikkut isertitsinissat-sinnut kisiat periarfissaasutut isigilissannginnatsigu. Eqqaamasariaqarporli Naalakkersuisut qaqugukkulluunniit Royalty-mik pilersitsinissaminnut piginnaatinneqareermata tamanna naleqqunnerpaatut aamma isigineqassagaluarpat. Tamanna aatsitassat pillugit ingerlatallu tamatumunnga pingaarutillit pillugit inatsit malillugu § 17, imm. 1-imi ammaanneqareerpoq.
Kialli ilisimavaa Royalty inuiaqatigiinnut kalaallinut aningaasarsiornikkut pissarsinarnerpaajusoq? Tamanna arlaannattaluunniit qulakkeersimanngilaa. Taamaammat Nunatsinni inuiaat peqqissaartumik sulinermik tunngaveqassappata, aamma iluanaarutissaq anginerpaaq piumaneqarpat, misissuilluaqqaarluni aalajangersaa-nissaq attanniagassaavoq pingaarutilik.
Piumagutta aatsitassarsiorfinnut piumasaqarsinnaavugut, atugarissaarnerup attannissaanut akitsuummik pilersitsissalluta. Aamma piumagutta namminiilivinnissamut akitsuummik pilersitsisinnaavugut. Piumagutta aatsitassanik assartuussinermut akitsuut pilersissinnaavarput.
Piumagutta qanorsuaq taaguserlugu akitsuummik pilersitsisinnaavugut. Kisiannili eqqaamasariaqarparput aatsitassanik qalluiffiusinnaasunik nutaanik suliluunniit aallartittoqartinnagu koruuninnguamilluunniit ataatsimik maannakkuugallartoq pissarsiassaqannginnatta. Suliffeqarfik pilersinneqariinngitsoq akileraarutinik aammalu akitsuutinik aallerfigineqarsinnaanngilaq! Naalakkersuisut maanna siunnerfigivaat aatsitassarsiortitsinermi immikkut aningaasarsiornikkut ilisimasaqarluartunik Siunnersuisoqatigiinnik pilersitsisoqassasoq.
Inuit Ataqatigiinnit tamanna isumaqatigilluinnarparput tapersersorlugulu, immikkummi ilisimasaqarluartut siunnersorsinnaavaatigut inatsisiliornikkut allatigullu qanoq Nunarput aatsitassarsiortitsinermit annertunerpaamik pissarsitinneqarsinnaassanersoq. Siunnersuisoqatigiit periarfissat suugaluartulluunniit misissortussaavaat isumassarsiaasinnaasullu iluatinnarsinnaasut mattutereerneqartussaanngillat. Takorloorneqarsinnaavormi piaarnerpaamik Royalty-mik eqqussiniarnerup kinguneriinnaraa, aatsitassarsiortitsinermit allatigut akitsuusersuilernikkut imaluunniit akileraarusiinikkut Nunatta annertunerujussuarmik pissarsitinneqarsinnaanera sapangerneqaannartoq. Tamanna kissaatiginngilarput.
lisimasaqassuseq qulaajaasimanerlu tunngavigalugit aqutsinissarput, partiip ataatsip soqutigisaanut akigissanngilarput. Inuiaqatigiit aningaasarsiornikkut iluanaaruteqarnerpaanissaat kissaatigisimagaanni kissaat siulleq tassaasariaqarpoq eqqortumik ilusiliinissaq. Ullumikkut piaarnerpaamik Royalty-mik pilersitsiniapallannerup mianernartoraa, aatsitassarsiorfinnut piumasarisinnaasatsinnik allanik mattusseratarsinnaanerat.
Naggataatigut erseqqissassavara Inuit Ataqatigiit Royalty akerlerinnginnatsigu. Aamma allatut isertitseriaatsinik atuutitsilersinnaaneq akerlerinngilarput. Qulakkeerusutarput ataasiinnaavoq, tassalu Nunatta inuisalu aatsitassarsiorfinniit aningaasarsiornikkut annerpaamik isertitaqaatigisinnaasaanik ilusiliinissarput. Tamannali qulakkeerumallugu sulineq nangittumik ingerlarsorpoq.