Danmark Natop timmisartuaqqanik inuttaqanngitsumik suliniutaanut annertuumut peqataaqqilerpoq

Natop timmisartuaqqanut inuttaqanngitsunut nakkutilliinermi atorneqartussanut suliniutaanut akisoqisumut pingaartinneqaqisumullu Danmark peqataaqqilernissaminut atsiorput. Tamanna naalagaaffiup karsinut 300 millioninik akeqarpoq.
2010-mi Folketingimi amerlanerussuteqartut aalajangeraluarpaat aningaasat sipaarneqassasut sakkutooqarnikkullu suliniut AGS-imik taaguuteqartoq nutaaliaasoq qilanneqassasoq.
Ilaatigullu Natop allattaaneraniit Anders Fogh Rasmussenimit isornartorsiusiqareersoq nunaqqatini illersoqatigiinnissamik isumaqatigiissumik sumiginnaanerarlugit partiit ukioq manna siusinnerusukkut sakkutooqarnikkut isumaqatigiissumi tunuliaqutaasut taamatut aalajangiineq allanngortippaat.
Tamannalu maannakkut timitalerneqarpoq.
- Peqataaqqilernermi pingaarnesaavoq Danmark maannakkut isumannaallisaanermi politikimik ingerlatsilermat, Natomilu nunat allat pitsaasumik nukittuumillu suleqatigeqqilerlutigik, illersornissamut ministeri Nick Hækkerup (S) Ritzauimut oqarpoq.

Læs: Droner skal overvåge vort havområde

- Danmark nunannguatut periarfissaqalerpoq illersornermi nukissanut nammineerluta akissaqartinngisaannagaagaluatsinnut peqataanissamut, nangippoq.
Nick Hækkerup oqarpoq maannakkut illersornissami missingersuutit aqunneqarluarnerulersimasut taamaattumillu taamaattunik aningaasaleeqataasoqarsinnaalluni.

- Eqqorpoq taamanikkut peqataajunnaarnermi aningaasat sipaarniarlugit taamaaliortoqarmat. Tamatuma kingorna ima pisoqarsimavoq maannakkut aningaasat pitsaanerujussuarmik aqunneqarluti, oqarpoq.
Illersornissamut ministeri isumaqarpoq Danmarkimut pitsaasuusoq timmisartuaqqat inuttaqanngitsut atorlugit naalagaaffeqatigiinni sumiiffiit avannarpasinnerpaat nakkutigineqarsinnaalernissaat.

- Kalaallit Nunaanni sermeq aakkiartortillugu imarujussuarmi aalisarneq, anngiortumik eqqussiniarnerit, umiartornerit annaassiniarnerillu nakkutiginissaat tamaviaarnarsigaluttuinnarpoq.

- Timmisartuaqqat inuttaqanngitsut akikitsumik sumiiffik annertooq nakkutigisinnaavaat. Taamaattumik timmisartuaqqat inuttaqanngitsut Danmarkimit atulernissaat sulissutigineqartariaqarpoq Kalaallit Nunaanni siunissami sulinitsinni.

AGS tassaavoq timmisartuaqqani inuttaqanngitsumik pisineq, taamaalilluni sakkutuut nakkutilliisut periarfissaginnerulerlutik qaartartut akeqqalluunniit sumiinnersut paasiniarneranni. Paasissutissat aamma timmisartunit sorsuutinit qaartartumeerniartortunit atorneqarsinnaapput.

AGS 2017-mi tamakkiisumik atulissasoq illersornissamut ministereqarfimmit nalunaarutigineqarpoq.