15-inik ukiullip inissiisarfimmiinnera ajorluinnarpoq
Niviarsiaqqap 15-inik ukiullip Nuummi inissiisarfimmut inissinneqarsimanera ajorluinnarlunilu ernumanarluinnarpoq, kisianni sapinngisarput tamaat iliuuseqarsimagaluarpugut, kommunimit niviarsiaqqap najugarisaanit oqaatigineqarpoq
Niviarsiaraq 15-inik ukiulik decembarip pingajuanili Nuummi pineqaatissinneqarsimasunut inissiisarfimmi tigummigallagaavoq tillinniarsimasutut nakuusersimasutullu pasineqarluni.
Tamannalu akuersaarneqarsinnaanngilluinnarpoq, niviarsiaqqap kommunerisaanit Kommune Kujallermit KNR-imi radioaviisimut oqaatigineqarpoq:
Læs "15-årig pige smidt i anstalt"
- Ernumanaqaaq ajorluinnarlunilu. Meeqqat inuusuttuaqqallu taama misigisaqartinneqartussaanngillat, Kommune Kujallermi isumaginninnermut pisortaq Mikkel Balle KNR-imut oqarpoq.
Niviarsiaqqamut atatillugu pisoq kommunimit sapaatip-akunnerini marlunni ilisimaarineqarsimavoq, inissiivissamilli naleqquttumik nassaarsinnaasimanani.
Læs "Under al kritik med pige i anstalt"
- Kalerrinneqarattali suliamik suliarinnittumik inuttaliisimavugut. Ajornartorsiulli tassaasimavoq nunatsinni meeqqanut inuusuttuaqqanullu ulloq unnuarlu angerlarsimaffinnik isumannaallisakkanik soqannginnera. Taamaattumik pineqartumut neqeroorummik pilersitsiniarnissaq pineqarsimavoq, Mikkel Balle radioaviisimut oqarpoq.
Paamaarussisoqannginneraraa
Maannalu kommuni aaqqiissutissamik nassaarsimavoq 15-inik ukiullip aqagu tallimanngornermiit ulloq unnuarlu angerlarsimaffimmi inissaqalernissaanik imaqartumik, kisianni tamanna aatsaat pivoq ulluni qulini pinerluuteqarsimasut inissiisarfimmeeqatigereeraalu.
Kommunilli suliamik arajutsisaqarsimanera Kommune Kujallermi isumaginninnermut pisortap ilumuunnginnerarpaa:
- Suliaq uninnganngilluinnarsimavoq. Suliaq manna ullorpassuarni ulapputigineqarlunilu suliarineqarsimavoq, inuppassuillu aaqqiissutissamik nassaarniarlutik akuusimapput, Mikkel Balle KNR-imut oqarpoq.