Uffe: Danmarkip Kalaallit Nunaat sumiginnartariaqanngilaa

Danmarkimi politikkikkut oqallinnermi Danmarkip Kalaallit Nunaatalu akornanni naalagaaffeqatigiinnerup sammineerukkiartornera nunanut allanut ministeriusimasup Uffe Ellemann-Jensenip uggoraa

Danmarkimi politikkikkut oqallinnermi Danmarkip Kalaallit Nunaatalu naalagaaffeqatigiinnerata sammineerukkiartorneqarnera nunanut allanut ministeriusimasup Uffe Ellemann-Jensenip uggoraa. Asseq: Sermitsiaq.AG

- Kalaallit Nunaanni pinngortitami pisuussutinik iluaqutiginninnissamut apeqqummi Danmarkip Kalaallit Nunaannut iligisatsinnullu akisussaaffini sumiginnartariaqanngila.

Taama nunanut allanut ministeriusimasoq Uffe Ellemann-Jensen, Venstre, sisamanngornermi Berlingskemi isumaliutersuummi allappoq.

- Ineriartorneq Kalaallit Nunaanni ingerlarsortoq pineqartillugu Danmarkimi naalakkersuisut isiginnaartuinnartut imminnut inissisimasorinarput. Kisianni isumannaallisaanikkut politikkimut tunngasut saqqummeraleriartortillugit tamanna attanneqarsinnaanngilaq. Uagullu nammineerluta takusinnaanngikkutsigu piffissap ingerlanerani iligisatsinnit tamatuminnga eqqaasinneqarnissarput eqqarsaatigineqarsinnaavoq.

Kina sassarterpoq
- Kinap atuuffia maluginiarnarpoq. Kina siumut isigisinnaassuseqarluni nassataqartumillu nunarsuarmi sumiiffinni assigiinngitsuni inissitsitersimasoq siunissami atortussiassanik pilersorneqarnermi pissarsisinnaaneq qulakkeersinnaajumallugu. Kinap aatsitassarsiorfinni, nunalerinermi, attaveqaatini il.il. aningaasaliisuni annerpaanngorsimanera Afrikami ilisimaarineqarluarpoq. Maannalu Kina Issittumut sorpassuit aamma sukkaqisumik pilerfigisaannut saappoq: Sikuusarunnaariartorneratigut ingerlaarfiit nutaat ammarneqarnerat - ukioq manna Kinamiut sikunik aserorterussuat pernaammik tamaaniippoq - piffissallu ingerlanerani aalisarfinnut uuliasiorfinnut gassisiorfinnullu appakaannissaq ajornannginnerulissalluni, Uffe Ellemann-Jensen allappoq.

Maluginiagaqarluni allappoq ’Danmarkip Kalaallit Nunaatalu akornanni naalagaaffeqatigiinneq Danmarkimi politikkikkut oqallinnermi sammineqarpallaarunnaariartortoq’, tamannalu 'alianartuunerarlugu’.

Uffe Ellemann-Jensenip isumaliutersuutaa tamaat maani atuaruk

Powered by Labrador CMS