15-inik ukiulik inissiisarfimmut igeriussaasoq
Nivissap illersuisuata naammaginngilluinnarpaa Nuummi pineqaatinneqarsimasut inissiisarfiannut sakkortuumik pinerluuteqarsimasut akornannut inissinneqarnera
- Pinerluutigisimasaa taamallu ukiukitsiginera aallaavigalugit pissusissamisuunngilluinnarpoq pineqaatissinneqarsimasunut inissiisarfimmiitinneqarnera.
- Soorunami tamaanga inissinneqarsimanini nuannarinngeqaa isumaqarpugullu pissusissamisuunngitsoq. Aliasuppoq.
Taamak oqarpoq Juaannannguaq Jensen KNR'ip Radioavisianut.
Taanna 15-inik ukiulimmut Nuummi pineqaatissinneqarsimasunut inissiisarfimmiittumut illersuisuuvoq. Tassungalu decembarip pingajuanili inissinneqarsimalluni.
15-inik ukiulik tillinniarsimasutut ataasiarlunilu persuttaasimasutut unnerluutigisaasoq, KNR naapertorlugu inersimasut sakkortuumik pinerluuteqarsimasut akornanni inissinneqarsimavoq. Niviarsiaq Kujataanit aggerfeqarpoq.
Naleqquttumik inissaqanganngilaq
Eqqartuussivik novembarip 28-anni aalajangerpoq niviarsiaq parnaarussivimmut assingusumi tigummineqarallassasoq. Ulloq unnuarlu angerlarsimaffimmut inissinnagu - soorlu nalinginnaasumik taamak pisoqartaraluartoq unnerluutigisaq 18-it inorlugit ukioqartillugit, illuatungaani Nuummi pineqaatissinneqarsimasut inissiisarfiani ineeqqamiitinneqarpoq, qularnanngitsumik Kommune Kujalliup angerlarsimaffimmut naleqquttumik nassaarsinnaannginnera pissutigalugu.
Inissinneqarfissaanik naleqquttumik nassaartoqannginnerata kingunerani niviarsiaq sakkortuumik pinerluuteqarsimasut akornanni issiatinneqarnera Juaannannguaq Jensenip naammaginngilluinnarpaa.
Radioavisimit nivissap angerlarsimaffittut kommunianik Kommune Kujallermik paasissutissanik pissarsiniaraluarpoq iluatsitsiganili. Niviarsiaq Sisimiuni ulloq unnuarlu angerlarsimaffimmi najugaqaraluarpoq, niviarsiarli Kujataanit aggerfeqarpoq.