Suliniussuarnut inatsit akuersissutigineqarpoq
- Nunat allamiunut inatsisip Folketingimi akuersissutigineqarnissaa tullinnguuppoq, Kuupik Kleist oqarpoq
Suliniussuarnut inatsisip upernaanut kinguartinneqarnissaa Siumup naggatissaa tikillugu sorsuutigigaluaraa, tallimanngormat nalunaaqutaq 15.47 inatsit saqitsaassutaasoq Inatsisartuni amerlanerussuteqartut akuersissutigaat.
Siumut partiini kisiartaalluni taaseqataanngilaq, partiit sisamat Inuit Ataqatigiit, Demokraatit, Kattusseqatigiit Partiiata Atassutillu inatsit, namminersorlutik oqartussat eqqunneqarmatali nunatsinni inuiaqatigiinnut inatsisitut pingaaruteqarnerpaatut taaneqarsimasoq, isumaqatigalugu taasisut.
- Naammagisimaartorujussuuvara inatsit akuersissutigigatsigu, Kalaallit Nunaata unammillersinnaassusianik nukittortitsisussaq, sulisartut akissarsiatigut atorfeqarnermilu atugassarisaat ajorseriartinnagit, Naalakkersuisut siulittaasuat Kuupik Kleist, Inuit Ataqatigiit, suliniussuarnut inatsisip aatsitassanullu inatsisip allannguutissaata akuersissutigineqarnerisa kingorna, taakkualu ukiakkut ataatsimiinnermi tallineqarsimasumi oqaluuserineqartut kingullersaraat.
Inatsisip kingunerisaanik sulisartoqarnermi illua'tungeriit isumaqatigiissutit namminneq isumaqatigiinniutigisassavaat. Inatsisikkulli qulakkeerneqarpoq suliniussuit sanaartornerisa nalaani sulisartut minnerpaamik SIK-p akissarsiarititaanik minnerpaamik akissarsiaqartinneqassasut.
Taamaasillunili saviminissamik piiaaffik aluminiumillu aatsitsivik ammaanneqanngillat.
Nunat allamiunut inatsit
- Maanna tullinnguuppoq nunat allamiunut inatsisip Folketingimi akuersissutigineqarnissaa, Kuupik Kleist oqarpoq.
Sulisartut nunat allamiut Nunatsinni sulisinnaassappata Danmarkimit akuersissuteqarnissaq pisariaqarpoq.
Tassami suliniussuarnut inatsimmi sulisartut nunat allamiunut tunngasoq piumasaqaatinit, Danmarkip najugaqarnissamut sulisinnaanermullu malittarisassaanit allaaneruvoq.
Taamaattumik qallunaat immikkut ittumik Kalaallit Nunaannut inatsisiliortariaqarput, suiniussuarni sulisartut nunat allamiut atorneqarsinnaanerannik tunngaviusussamik.
- Inatsisinik atortitsinermut ministereqarfiup maanna kalaallit oqartussaasut attaveqarfigissavai, siunertaralugu suliniutip aallartinneqarnissaa, taanna ingerlanneqassammat suliniussuarni sanaartornerup nalaani sulisartut nunat allamiut atorneqarnissaannik qallunaat inatsisissatut siunnersuummik saqqummiussaqannginneranni, inatsisinik atortitsinermut ministeri Morten Bødskov (S) Ritzau-mut oqarpoq.
Naalakkersuisut neriuutigaat qallunaat naalakkersuisui siunnersuummik saqqummiussissasut qallunaat nunat allamiunut inatsisaanni immikkut akuersissutitalimmik, taamaasilluni kinamiut nunat allamiullu allat tusintilikkaat Kalaallit Nunaanni suliniussuit sanaartorneqarneranni peqataasinnaaqqullugit.
- Neriuppugut inatsit januaarimi februaarimiluunniit allanngortinneqarumaartoq, Kuupik Kleist oqarpoq.
Taamatulli immikkut akuersissuteqartoqaraluarpat saviminissamik piiaaffik aluminiumillu aatsitsivik ammaanneqanngillat.
Suliniut ataasiinnaq
- London Miningip Isuani saviminissamik piaaffeqalernissamik qinnuteqaataa maanna suliaraarput, Inatsisartunillu pisinnaatinneqarsimavugut Maniitsumik aluminiumik aatsitsivimmik pilersitsinissamut amerikarmiut selskabiannik Alcoa-mik isumaqatigiinniarnerit nanginnissaannut, Kuupik Kleist oqarpoq.
Suliniussuarnut inatsisip akuersissutigineqarneratigut suliffissuaqarfinnik nutaanik pilersitsinissamut alloriartoqarpoq, Naalakkersuisullu neriuutigaat inatsisit atorlugit malittarisassatigut aalajaassutsimik ammasuunermillu pilersitsisimallutik, taamaasilluni suliniussuit suli amerlanerusut ingerlanneqarsinnaaqqullugit. Ullumikkulli suliniutinik allanik peqanngilaq, sulinmiussuarnut inatsisip piumasaqaataanik naammassinnittunik: Sanaartornermut minnerpaamik 5 milliarder koruunit aningaasaliissutigineqassasut.
- Naatsorsuutigaarput suliniussuit kinguneqassasut amerlanerusunut suliassaqartitsinermik kalaallillu sulisartut ilinniagaqartinneqarnerannik, Kuupik Kleist oqarpoq.
- Neriunartumik aatsitassanik piiaaffissani suliniussuassanilu kalaallit inuiaqaatigiit sapinngisamik annertunerpaamik pissarsinissaat qulakkeerniarlugu Naalakkersuisut qaqugukkulluunnit suliniuteqassapput, taamaattumillu immikkut ilisimasalinnik suleqatigiissitaliussaagut, pitsaanerpaamik nakkutilliinissaq qulakkeerniarlugu.
Suliniussuarnut inatsisikkut aningaasaleerusussinnaasut takusinnaavaat Kalaallit Nunaanni aningaasaliissuteqarusukkunik sunik atugassaqartinneqarnerlutik.
-Akerlianik Kalaallit Nunaata pisariaqartippaa avataanit aningaasaliisoqarnissaa, ukiuni aggersuni atugarissaarnissarput qulakkeerniarlugu, Kuupik Kleist oqarpoq.