ICC suliniutinut angisuunut inatsit sunniuteqarfigaa
Suliniutinut angisuunut inatsimmi inatsisinut naammagittaalliut sumut piva - taakkununnga ilanngullugit naammagittaalliorsinnaanermut pisinnaatitaaffik, ICC aperaaq
ICC-p Inuussutissarsiornermullu Ataatsimiititaliap akornanni oqaloqatigiinneq ajunngitsumik ilusilersuiffiulluartumik ingerlasimasoq, aamma ICC Kalaallit Nunaanniit siunnersuutigineqartut aamma avoqqaarliutigineqartut amerlanerpaartaat akuerineqarsimasut annertunerusumik mikinerusumilluunniit siunnersuutinut ilanngunneqarsimallutik.
- Naalakkersuisutiguunngitsumik Suliniaqatigiiffiit aalajangigassanut annertunerusumik akuutinneqarnissaat aamma inuiaqatigiit soqutigisaasa ilanngullugit eqqarsaatigilluarneqarnissaat pillugit. Nuannaarutissaavoq ataatsimiititaliap isumaliutissiissutaata atuarnerani inuiaqatigiinniit suliniutit annertuut pillugit inatsisissatut siunnersuut pillugu qisuariaatigineqartut assigiinngitsut pineqartut ataatsimiititaliamit ilanngunniarneqarsimaneri paasillugu, ICC'p pisortaa tusagassiivinnut allappoq.
Illuatungaagut Aqqaluk Lyngemit aarleqqutigineqarpoq innuttaasut akerliunerat uani eqqarsaatigineqanngimmat.
-Inuiaqatigiinniit anersaarulutit malunnarluartut suli attanneqarnerat oqaatigisariaqarpoq, taamaaliornikkummi suliniutinut annertuunut tunngassuteqartut ajornartorsiutaajunnartut imaannaanngitsut iluameersumik eqqarsaatigilluakkamillu qanoq iliuuseqarfigineqarsinnaaneri annikitsuinnarmik piffissaqarfigineqarsinnaasimanerat. Inuiaqatigiit akornanni peqqissaartumik eqqarsarluarnermillu tunngaveqartumik isummersornissaq siunertaralugu soqutigisaqartuusut tamarmik akuutinneqarnissaat tamanit suli pingaarnerpaajuvoq. Allatut oqaatigalugu arritsumik peqqissaartumilli ulapittariaqarpugut, Aqqaluk Lynge allappoq.
Taamaattumik tupigusuutigaa naammagittaarliorsinnaaneq suli paasiuminaappoq.
- ICC Kalaallit Nunaanniilli Aatsitassanut inatsimmut allannguutissatut siunnersuutitaa pillugu inassutigisimasatta ilaannai isumaliutissiissummi ilaatinniarneqarsimaneri maluginiarpavut. Naammagittaarliorsinnaanermullu pisinnaatitaaffik pillugu soorlu Avatangiisinut Illersuinermut Inatsimmisuulli annertusineqarsinnaanera siunnersuutigineqarmat iluarisimaarnarpoq, aamma naammagittaalliuteqarsinnaanerup sapaatip akunnerinik arfinilinnik sivisussusilimmik piffissalerneqarnissaa siunnersuutigineqarmat. ICC Kalaallit Nunaanniilli Aatsitassanut inatsimmi aamma allannguutissatut siunnersuummi aalajangiisinnaassuseqarnermut piginnaatitsissutit erseqqissumik Naalakkersuisut aamma aqutsisoqarfiit marluusut, Avatangiisinut Aqutsisoqarfiup aamma Aatsitassanut Aqutsisoqarfiup, akornanni pisariaqartumik inatsisitigut avissaartitsisimannginneq suli erseqqissumik paasinarsinnginnera ilanngullugu uparuartorpaa, tamannattaarli aamma naammagittaarliorsinnaanerup qanoq periarfissaqartinneqarsinnaaneranut sunniuteqartuuvoq aamma.
- Inuussutissarsiornermut Ataatsimiititaliap pineqartoq pillugu inatsisissatut siunnersuutip aamma tusarniaanermut ilassutitut akissuteqaammiittutigoortumik oqaasertaliuunneqarsimasut naammaginartumik nassuiaatigineqarsimanerattut nalilerpaa, taakkunanimi ICC Kalaallit Nunaata aamma Transparency Greenlandip tusarniaanermi akissuteqaataat oqaaseqarfigineqarmata. ICC Kalaallit Nunaanniilli akissuteqaat pineqartoq suli takunngimmagu ICC Kalaallit Nunaata inatsisimmi amigaatigineqartutut ujartorneqartoq pillugu suut tunngavigalugit Inuussutissarsiornermut Ataatsimiititaliap aamma Naalakkersuisut sooq ilanngussaqarsimannginnerannut suli paasiuminaappoq, Aqqaluk Lynge oqarpoq.
Inatsisip ualimut akuersissutigineqarnissaa naatsorsuutigineqarpoq.