Imarisaa nersualaarpaat, sulialli ingerlasimanera nersualaarnagu
Suliniutinut angisuunut inatsisissaq Inuussutissarsiornermut Ataatsimiititaliap isumaliutissiissutaanit pitsanngoriartinneqartoq, Transparency Greenland nalunaarpoq
Imarisatigut allannguutit Inatsisartuni Inuussutissarsiornermut Ataatsimiititaliamit suliniutinut angisuunut inatsisissamut ilanngunneqartut Transparency Greenlandimit naammagisimaarneqarluarput.
Taama suliniaqatigiiffiup siulittaasua Anders Meilvang KNR radioaviisimut oqarpoq.
- Maanna ammanerujussuanngortoqarpoq, assersuutigalugu akuersissuteqartoqartinnagu tamat tusarniaavigineqaqqaartartussanngorput. Aamma aalajangiinernut tamat naammagittaalliuuteqarsinnaanerat periarfissatut ilanngunneqarpoq, taamaattumik imarisaa eqqarsaatigalugu naammagisimaarinnittorujussuuvugut, oqarpoq.
Naammaginanngitsoq
Suliniutinulli angisuunut atatillugu suliap ingerlanneqarnissaanik naalakkersuisut aaqqissuussisimanerat suliniaqatigiiffiup suli naammaginngilaa:
- Imarisaanik naammagisimaarinninnerput kisimi isumaqanngilaq. Suliamuna ingerlanneqarnera tamarmi naammaginanngitsoq. Aalajangiisoqalersinnagu inuiaqatiginni ammasumik periaaseqartuni, nutaaliaasumik tamat oqartussaaqataanerannik ingerlatsiviusumi innuttaasut akuutinneqartarnissaat pisariaqarluinnarpoq, Anders Meilvang KNR-imut oqarpoq nangillunilul:
- Inaarutaasumik aalajangiisussat soorunami tassaapput politikerit, kisianni innuttaasunut tusarniaasimatinnatik taamaaliorsinnaanngillat.
Anders Meilvang Danmarks Radiop aallakaatitaani 'Orientering'-imi tusarnaarsinnaavat uani.