Aleqa: Aap, oqaluttuarisaanermut pingaaruteqarpoq... kisianni
Aatsitassanut suliniutinullu inatsisissat aqqutigalugit Kalaallit Nunaanni oqaluttuarisaanermut pingaarutilimmik pisoqartussaaneranik Kuupik Kleistip oqarnera Siumup siulittaasuata Aleqa Hammondip ilumoornerarpaa. Kisianni tamatuma innuttaasunit amerlanerussuteqarluartunit tapersersorneqarani pinissaa aamma oqaluttuarisaanermut pingaaruteqarpoq, oqarpoq
Sisamanngornermi siusinnerusukkut naalakkersuisut siulittaasuata Kuupik Kleistip, IA, aatsitassanut suliniutinullu angisuunut inatsisissat akuersissutigineqarnissaat namminersorneq pillugu inatsimmut kilisaatersorlunilu aalisalernermut assersuuppai.
Inatsisillu oqaluttuarisaanermut pingaaruteqarput, Siumup siulittaasua Aleqa Hammond oqarpoq.
- Inatsisinit Kalaallit Nunaat naalakkersuinikkut, aningaasaqarnikkut piorsarsimassutsikkullu allanngortinneqassaaq, aalajangiisuusumillu assigiinngissutaasoq tassaavoq tamatuma innuttaasunit amerlanerussuteqarluartunit tapersersorneqarnani Kalaallit Nunaata oqaluttuarisaaneranik allattoqarnissaa, Sermitsiaq.AG-mut oqarpoq.
Læs "Kuupik: Der bliver skrevet historie"
Taamaattumik Kuupik Kleist sisamanngornermi siusinnerusukkut oqarami Kalaallit Nunaat ataatsimoortoq siuttuuffigigini neriuutigalugu, taava tamatumani kukkuvoq, Aleqa Hammond oqarpoq.
Tamatuma peqatigisaanik Siumup akerliunera taamaallaat 'suliap ingerlanneqarneranut' tunngasuunerarlugu Kuupik Kleistip oqaasii aamma ilumuunnginnerarpai.
- Partiini kisiartaalluta suliniutinut angisuunut inatsisissap imarisaa erseqqilluinnartumik akerlerigipput tamanut ammasumik oqaatigaarput, oqarpoq, tamatumalu peqatigisaanik erseqqissaatigalugu inatsissaq tusarniaaneq tamatumalu kingorna Inatsisartuni suliarinninneq aqqutigalugu pitsanngoriartinneqarsimasoq.