Kuupik: Oqaluttuarisaanermut ilanngutissaaq
Inatsisartut aatsitassat suliniutillu angisuut pillugit inatsisissamik akuersinissaat namminersorneq pillugu inatsisituulli kiisalu kilisaasersorluni aalisarnerup eqqunneqarneratuut pingaaruteqartigaaq, Kuupik Kleist isumaqarpoq
Ullumi aqagulu Inatsisartut aatsitassanut suliniutinullu angisuunut inatsisissaat oqaluuseralugillu akuersissutigippassuk tamanna nunatta oqaluttuarisaaneranut ilanngutissaaq, naalakkersuisut siulittaasuat Sermitsiaq.AG-mut oqarpoq.
- Oqaluttuarisaanermi nikinnertut annertuujupput. Naalakkersuinikkut tamanna namminersorneq pillugu inatsimmut assersuunneqarsinnaavoq, tamannami allannguinerit angisuut kingullersaraat, inuussitissarsiornikkullu kilisaasersorluni aalisarnermut assersuunneqarsinnaalluni, Kuupik Kleist oqarpoq.
- Inuiaqatigiit aningaasaqarnikkut nutaamik aaqqissuussaaneranut alloriarneruvoq. Suliffissuaqarnikkut oqaluttuarisaanitsinni pisuussutinik uumassusilinnik taamaallaat inuussuteqarsimavugut, maannakkulli aningaasaqarnitsinni sukaq alla ilanngunneqarsinnaalerpoq, nangippoq.
Arfininngormat nunarput nutaajunavianngilaq
Kuupik Kleistilli erseqqissarpaa nunarput allanngungaarnavianngitsoq tallimanngorpat Inatsisartut ataatsimiinnerat naammassineqarpat.
- Ullumikkut aalajangiinitta kingunerisassai tamakkiisumik ilisimanngilagut. Oqartoqarsinnaanngilarli arfininngorpat sorpassuarnut akuersissuteqarsimasugut, Kuupik Kleist oqarpoq, suliallu sukkavallaamik ingerlanneqarsimaneranik oqartoqarnera isumaqatiginagu, 2007-miilli una suliarsimavarput, erseqqissaavoq.
Aatsitassat suliniutillu angisuut pillugit inatsit aningaasaqarnikkut nammineernerulernissap qulakkeernissaanut suleriaqqinnissami tunngavissaannaavoq; aatsaat akuersinerup kingorna suliassaviit utaqqipput, isumaqarpoq.
Aatsaat maannakkut ajornakusuulissaaq
- Maannakkut suliassat ajornakusuulertussaapput, tassani tigussaasumik takusinnaalissagatsigu inatsisit qanoq kinguneqarnersut.
Tunngavissat inissiput oqartariaqarpungalu suliffeqarfinnut nunatsinnut suliartortussanut annertuunik piumasaqartugut. Takussavarput tamatsinnut naammaginartumik isumaqatigiissusiorsinnaanersugut, Kuupik Kleist oqarpoq, piffissamilu aggersumi qanoq ineriartortoqarnissaa pissanngatigalugu, nunanimmi allanit suliffeqarfinnit isumaqatigiinniarnerni sapiissuseqartoqartariaqarpoq.
Qanorluunniit aalajangiisoqaraluarpat ulluni tulliuttuni aalajangiinerit oqaluttuarisaanermut ilanngutissapput, Kuupik Kleistili misigisimava nunatsinnut ataasiusumut siuttuulluni nunatsinni ingerlavigiligassamut tapersersorneqarluni:
Sapinngisarput tamaat sulisimavugut
- Tamanna kissaatigiuaannarparput. Eqqasuuteqarnanga oqarsinnaavunga akuersaagassat tamaasa akuersaartarsimagipput atituumillu isumaqatigiittoqarnissaa sulissutigalutigu.
- Siumulli suliniutit angisuut pillugit inatsisissaq kinguartikkusuppaa?
- Suliap ingerlasimaneranut akerliuneruvoq. Oqaannarsinnaavunga aningaasaqarnerup ajalusoorsinnaanera ajoraluartumik utaqqisinnaanngitsoq aammali nunatta avataaniittut utaqqisinnaanatik, Kuupik Kleist oqarpoq.
Uninngaannartoqarnissaanut akisussaarusunngilaq
Piffissaq eqqorlugu iliuuseqartoqartariaqarpoq, maannakkulu taamaaliortoqartoq naalakkersuisut siulittaasua isumaqarpoq.
- Nalornissuteqanngivippunga, iliuuseqannginnissaq akisussaaffigisinnaanngilara. Taamaaliornikkut nunatsinni inuaqatigiit sumiginnarneqassapput.
- Maannakkut pisussaaffigaarput inuuniarnermi atugassat ajorseriartinneqannginnissaat, siunissamili pitsanngoriartikkusunnaqaat, taamaattumillu iliuuseriniakkut ukua pingaarluinnartuupput, Kuupik Kleist oqarpoq.