Skip to main content

Issittumi alapernaarsuut nutaaq

Illersornissamut isumaqatigiissutip ilaatut umiarsuaq alapernaarsuut nutaaq pisiarineqassaaq taanna issittumi atorneqassaaq

Danmark umiarsuarmik alapernaarsuummik nutaamik pisissaaq issittumi atorneqartussaq. Illersornissaq pillugu tallimanngornermi ualikkut isumaqatigiissummi atsiorneqartussami taanna ilaavoq.  

Danmarkip Issittumi suliniutaanut aningaasaliissutit 120 millioner koruuninik amerlineqarput. Tamanna pivoq partiit isumaqatiiginniartut isumaqatigiissutigimmassuk qulimiguulinnut Seahawkinut 4 milliarder koruunit atorneqarneqassasut, sakkutuut imarsiortut ilaatigut Issittumi suliaqarnerminni atugassaat. 

- Umiarsuarmik alapernaarsuummik nutaamik pisissaagut taanna inuinnarnik sullissinermi imaanilu nakkutilliinermi atorneqassaaq, aamma imartanik umiarsuarnit takornariartaatinik containerinillu angallassisunik amerliartuinnartunik aqqusaarneqartunik alapernaarsuissaaq Tartupaluup aqqusaarneqarsinnaanngornissaanut atorneqartussanik, SF sinnerlugu illersornissaq pillugu oqaaseqartartoq Jonas Dahl oqarpoq. 

 

Knud Rasmussenitut ittoq

Umiarsuaq alapernaarsuut nutaaq Knud Rasmussen-imut assingusussaq Atlantikup avannaani angalanissamut piukkussagaasoq qulimiguulinnut mittarfeqqassaaq, qulimiguullit nutaat Seahawkit nassatarisinnaassallugit. 

Ritzauip paasissutissiinera naapertorlugu illersornissamik isumaqatigiinniarnerit pikkunartut ingerlanneqarsimapput sipaarniarnermi 20 millioner koruunit Issittumi suliniutigisassatut pilersaarummit peerneqarlutik. Jonas Dahlilli naqissuserpaa suliassaqarfimmi tassani pitsanngorsaasoqartoq.

- Taamaakkaluartoq Issittumi suliassanut pitsanngorsaatit annertupput tamannalu uannut pingaaruteqarsimavoq, Jonas Dahl oqarpoq. 

SF'imit immikkut nuannaarutigineqarpoq illersornissaqarfiup naatsorsuutaanit isumaqatigiissutikkut 2,7 milliarder koruunit allanut atorneqartussat nassaarineqarmata.

- Isertuunneqassanngilaq sakkutuuaraqartitsisarneq annermik sipaarfigerusukkatsigu. Kisianni uagutsinnut pingaaruteqarpoq illersornissamut sakkutooqarfik 2,7 milliarder koruuninik sipaarfiginissaa, aningaasat taakkua pilersuisunut kisimiittunut atugarissaarnermullu atorneqarsinnaaqqullugit, Jonas Dahl oqarpoq.

Aningaasat 2,7 milliarder koruunit illersornissamik sakkutooqarfiup missingersuutaata 15 procenteraat. 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER