Inuusuttuaqqat nunaqarfimmi inuiaqatigiinni kiffartuussipput
Inuusuttuaqqat suliniummi Timi Asimi peqataasut ulluni makkunani Kapisilinniipput inuiaqatigiinnik kiffartuussillutik nunaqarfimmilu innuttaasunut sammisassaqartitsillutik
Timi Asimi peqataasut ukiaq manna naggataarutaasumik pinngortitamiipput. Tamanna Nuup Kangerluani Kapisilinnik ingerlanneqarpoq.
- Ilassilluarneqarpugut malugisinnaavarpullu innuttaasut kissaatigigaat akulikinnerusumik takkuttarnissarput pissutigalugu nunaqarfimmi nuannaarnermik pilersitsigatta, suliniuteqartoq aallarniisorlu Kim Godtfredsen oqarpoq.
Ilinniartut Kapisillit eqqaanni saliinermik ingerlatsipput, atuarfimmi atuartunik sammisassaqartitsillutik, tuperni kaffisortitsillutik utoqqarnut pulaarlutik ikiuullutik aamma innuttaasut illuanni crossfitsimik ingerlatsillutik. Nunaqarfimmi akuliunnissaq siunertaavoq, Kim Godtfredsen oqarpoq.
Timi Asimi ilinniartut sapaatit akunneri 13-it malitassaminnik ingerlatsereerput, suliniut Kommuneqarfik Sermersuumit aamma Namminersorlutik oqartussanit tapersersugaavoq.
- Suliniut naammassiartorpoq ilinniartut nalunnermik annaassiniarnermillu misilitsinnerit sakkortuut amigaatigaat taakkua sapaatip akunnerata tulliani aallartissapput. Suliffeqarfiit arlallit aamma pulaarneqartussaapput, taamaaliornikkut inuusuttuaqqat siunissami ilinniarfigisinnaassaminnut isumassarsiussapput, Kim Godtfredsen nassuiaavoq.
Timi Asimi inuusuttuaqqat 15 aamma 18 ukiullit sammisarai inuusuttuaqqat ilinniarfinni nalinginnaasuni suli inississimanngitsut.