Skip to main content

Akissarsiat qaffasikkaluaqisut milliardilinnik sinneqartoorpoq

Svenskit saviminissiornermik selskabiat naalagaaffimmit pigineqartoq siorna 13 milliarder koruuninik sinneqartooruteqarpoq - piiaaffimmi sulisut 30.000-35.000 koruuninik qaammammusiaqaraluartut. London Miningip svenskit assilinianngilai 

Kaaviiaartitat 27 milliarder koruunit missarpiaanni. Sinneqartoorutit 13 milliarder koruunit missarpiaanni. Svenskit saviminissiornermik ingerlatsiviat naalagaaffimmit pigineqartoq LKAB, Sverigep avannaani saviminissaqarfinnik marlunnik ingerlatsisoq, siotna taamatut angusaqarpoq.

Imaanngilarli piiaaffinni sulisut akissarsialuttut. Svenskit piiaaffimmi sulisut svenskit aningaasaannik 33.000 aamma 40.000 koruunit akornanni qaammammorsiaqarput, tassa qalunaat aningaasanngorlugit 29.500-35.000 koruunit akornanni, Weekendavisen ullumi tallimanngornermi allappoq.

Sverigemi piiaaffinnik sanasut aamma taamatupajaaq akissarsiaqarput, allaaserisami ´Vores jern er som den norske olie´-mi allassimavoq, tassani sammineqarluni saviminissamik piiaaffimminit Sverige qanoq aningaasarsiortiginersoq.

London Miningip Nuup Kangerluani saviminissamik piiaaffissaa sananeqassappat piiaaffimmi sulisut qanoq akissarsiaqassanersut suli ilisimaneqanngilaq, sulisartulli pingaartumik kinamiut minnerpaamik kalaallit akissarsiaritisaannik minnerpaamik akissarsiaqassappata qaammammusiaat 13.000 koruunit missaanniisapput - tassa akunnermut 80 koruunit missaanni.

London Miningip paasissutissiinermut pisortaa Kaj Kleist Weekendavisenimut oqarpoq ´akissarsiat akunnermut 80 koruuninit allarluinnaassasut´, annertunerusumilli erseqqissaanani.

Immaqa akikinaariniarpoq
Weekendavisenimit aperineqarami London Mining sooq taama akissarsiakitsitsigissanersoq, svenskit aatsitassarsioqatigiiffianni LKAB-mi paasissutissiinermut pisortaq Lotta Fogde imatut akivoq:

- Tamanna naluara. Ilissi naatsorsuinissinnik tunngaveqarpoq. Immaqa aningaasaliinerat nalorninartoqarpoq. Immaqa London Mining taamaasilluni akikinaariniarsarivoq, Lotta Fogde oqarpoq.

Tamannali peqatigalugu erseqqissarpaa svenskit aatsitassarsioaqatigiiffiat sanaartornermut attaveqarfiillu ineriartortinnerannut aningaasartuutikinnerusoq.

Akerlianik Nuup Kangerluani saviminissamik piiaaffik pilersaarutit malillugit ima sinneqartoortitsigisassaaq, piiaaffiup sananissaanut taarsigassarsiassatut pisariaqartinneqartut 14 milliarder koruunit, London Mining naapertorlugu ukiut 3,5 ingerlaneranni akilerneqarsinnaallutik.

Taamaattumik Weekendavisenip London Miningip paasissutissiinermut pisortaa Kaj Kleist aperaa, taava selskabi sooq qaffasinnerusumik akissarsiaqartitsinianngitsoq akivoq ´taava piiaaffik akilersinnaassanngilaq´.

 

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER