Skip to main content

Nuup Kangerluani aatsitassiorfissamik pilersaarut nutaaq

- Avatangiisinik illersuiniaqatigiiffiit ernumapput: – Kangerlummi sunnertianerpaat ilaat eqqorneqassapput

Nuup Kangerluani Ilulialimmut pulammagiamiippoq kangerlummi qaqqat timmiaqarfiit annersaat Innajuattoq, 1.206 meterinik portussusilik.

Qaqqap kujataa’tungaani aasaanerani immap timmiarpassui piaqqiortarput, ilaatigut naajat, taateraat, serfat ukiulli ilaanni aamma oqaatsut.

Taamaattumik kommunimi aammalu pinngortitamik avatangiisinillu illersuiniaqatigiinni ernumanartinneqartorujussuuvoq selskabi aqqa suli ilisimaneqanngitsoq, Aatsitassanut Pisortaqarfimmut qinnuteqarsimammat Nuup eqqaani sumiiffinni pingasuni katillugit 161 kvadratmeterinik annertussusilimmi ujaasinissamut akuerineqarnissaminut: Akiani, Qeqertarsuarmi – aamma qaqqami timmiaqarfimmi Innajuattumi tamarmi. (Nunap assinga takuuk).

Selskabi akuerineqaruni anguniagalimmik pitsaassuseqarluartumik kalciumfeldspat-eqarfinnik ujaasissaaq, taannalu aluminiumik fiberglasimillu suliffissuaqarfinni atorneqartarpoq.

Selskabi ujaasinissamut akuersissummik pissaguni 2013-imi piffissami ujaasiffimmi ujarassiuunik misissuisitsiniarpoq qaartiterinerit, qamutit assakaasullit qillerinerilluunniit atornagit. Aallarnisaataasumik misissuinerni paasisat aalajangiisuussapput selskabip assersuutigalugu tamaani misissugassanik qillerinermit atorlugit ujaasinini nangissaneraa.

 

Kommuni ernumavoq

Kommuneqarfik Sermersuumi Inuussutissarsiutinik Ineriartortitsinermut Ataatsimiititaliap aamma Aningaasanut Ataatsimiititaliap, Aatsitassanut Pisortaqarfiup tusarniaataanik suliarinnissimasut, pilersaarutit, Nuup Kangerluani piiaaffimmik allamik kinguneqarsinnaasut, ernumanartoqartippaat.

Kommuneqarfik Sermersooq qinnuteqaammut pingasunik piumasaqarpoq:

1)    Qaqqamut timmiaqarfimmut Innajuattumut akuersissuteqartoqanngilluinnassaaq.

2)    Akiani eqaloqassusia immikkut eqqarsaatigineqassaaq.

3)    Qeqertarsuarmi nattorallit piaqqiortut immikkut eqqarsaatigineqassapput.

–  Innajuattumi ujaasinissamut akuersissuteqartoqassappat tamanna sioqqullugu sakkortuumik eqqarsaatigineqartariaqarpoq aatsitassanik piaasoqarsinnaanersoq Nuup Kangerluani qaqqat timmiaqarfiit pingaarnersaannut erloqinartumik kinguneqaateqanngitsumik, Kommuneqarfik Sermersooq oqarpoq.

Annertunerusumik suliniuteqartoqalerneratigut timmissat eqqissisimatinnerannut malittarisassat atuuttut unioqqutinneqarsinnaapput.

 

NGO-t paasissutissanik ujartuipput

Aatsitassanut Pisortaqarfiup ujaasinissamut akuerissummik qinnuteqaat tusarniaavigitippaa .... Kommuneqarfik Sermersooq isumaqarpoq sumiiffinnut pingasunut, tamaani najugaqartunut taama annertutigisunik soqutigisaqarfiusunut, tusarniaaneq tamanut ammasumik tusarniaavigineqartariaqartoq.

NGO-llu tamatumunnga isumaqataalluinnarput.

–      Soqutigisaqaqatigiippassuit sumiiffiit taakkorpiaat pingasut soqutigisaqarfigisorujussuuvaat, assuarnartutullu isigaara tusarniaanermi aamma NGO-t ilaatinneqanngimmata, soorlu KNAPK, Nuukfjordens venner, Avataq uagullu, timmissanik soqutigisaqaqatigiit peqatigiiffianni Timmiaq-mi allatsi Hasse Hedemand Nuuk Ugeavisimut oqarpoq.

–      Uuliamik ujaasineq pillugu siusinnerusukkut Aatsitassanut Pisortaqarfik oqaloqatigilluartarsimavarput, taamaattumillu tupigusuutigaara suleqatigiilluarneq tamanna nanginneqanngimmat, Hasse Hedemand oqarpoq.

 

Kangerluk soqutigineqaqisoq

–      Aatsitassanut Pisortaqarfiup London Mining ilinniarfigisimasariaqaraluarpaa, pinngortitamut avatangiisinullu peqatigiiffimmi Avatami siulittaasoq Mikkel Myrup Nuuk Ugeavisimut oqarpoq.

–      Isuani saviminissaqarfiup suliniutigineqarnerani innuttaasut kingusippallaamik peqataatinneqalerput, tamannalu pakatsinerujussuarmik kinguneqarsimavoq, pinngitsoorneqarsimasinnaagaluartoq tamaani najugallit aalajangiiniarnermi siusinnerujussuakkut akulerutsinneqarsimasuuppata.

–      Maanna allaanngilaq periuseq siunertaqanngitsoq Aatsitassanut Pisortaqarfiup nangeqqikkaa, pinngortitaqarfiit pingasut sunnertiasut matoqqasumik tusarniaavigitillugit.

 

Mikkel Myrupip aamma tikkuarpaa sumiiffimmi ataatsimi, assersuutigalugu Nuup Kangerluani, ujaasinissamut akuersissutinik amerlavallaanik tunniussinerup ulorianartoqarnera.

–      Ujaasinissamut akuersissutikkut suliniutip siuarsarnissaanut selskabit arlalinnik pisinnaatitaaffilerneqartarput, suliniutilli tamarmik ataatsikkut aallartinneqarpata avatangiisit annertoorujussuarmik artukkerneqassapput, tamannalu ernumanartoqartiinnarsinnaavarput.

 

Nuup Kangerluani London Mining qinnuteqarpoq Isuani saviminissamik piiaaffimmik ammaanissaminut, NunaMinerals-ilu Qeqertarsuarmi Qussummilu kuultimik ujaasivoq.

Allaaserisat allat atuakkit Nuummi pisartut assigiinngitsut paasisassarsiorfigalugit. Nuuk Ugeavis uani akeqanngitsumik aaneqarsinnaavoq:

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER