Taamaattumik qallunaat nunarsuarmi tatiginninnerpaajupput
Qallunaat tatiginninnermi nunarsuarmi pissartaapput - imaluunniit 'inooqatigiinnermi pisoorsuaassutigaat' soorlu Aarhus Universitetimi professorip taamak taagaa
Nunanit allamiut Danmarkimiittut tupigusuutigisarpaat Danmarkimi aasakkut nunaannarmi angalaartilluni aqquserngit sinaanni jordbærinik, aspargesinik tuniniaaviit sikaat karsiarannguani aningaasanik utertussanik imalimmik nakkutigineqanngitsunik naammattuigaangamik.
Sulili tupinnarnerulersarpoq tuniniaavimmik piginnittup unnukkut karsi aningaasanik ulikkaartoq aasinnaasarmassuk. Nunarsuarmi sumiiffinni allani tamangajanni jordbærit, aspargesit aningaasallu tammareersimassagaluarput.
Qallunaat tatiginninnerat nunarsuarmi nallerneqarsinnaanngilaq, Aarhus Universitet professor Gert Tinggaard Svendsen naapertorlugu tatiginninneq taanna qallunaat 'inooqatigiinnermi pisoorsuaassutigaat'.
Tamanna pillugu annermik atuakkiaani ’Tillid – Tænkepauser’ atuagassaqarpoq. Atuagaq taanna ukioq manna Aarhus Universitetsforlagip saqqummersitaasa arlallit ilagaat. Atuagaq qallunaatut atuffassissutigineqartoq uani aamma pissarsiarisinnaavat.
Inuiaqatigiit atugarissaartuunerat tatiginninnermik tunngaveqarpoq
Qallunaat naalagaaffimmik, politiinik inunnillu takornartanik tatiginnilluartuupput, nalungiarsuutitik nakkutigineqanngitsut pisinniarfiit silataannut inississinnaagamikkit.
Qallunaat pitsaanerpaamik angusaqarput misileraalluni aningaasivinnik aningaasanik imalinnik aqqusinernut eqqaariarluni paasiniarneqarmat taakkunannga qassit imaannik nikisitsinani utertinneqarnersut.
Qaallunaanit 100-nit 78-it anngaapput aperineqaramik 'Inuit amerlanerit tatigisinnaavigit?', apeqqut assingusoq brasiliamiut akornanni apeqqutigineqarmat 100-nit pingasuinnaat angersimasut.
Qallunaat taamak tatiginnitsiginerat sianiitsuliornertut uppertikkuminartuunerannillu nalilerneqarsinnaasungavoq.
Inuiaqatigiilli aallaavigalugit taamannak isumaqarneq ajunngilluinnarpoq, tassa taamak tatiginnitsigigatta, inooqatigiinnermi assigiiaammik ileqqoqarneq aningasaqarnermik pitsaasumik sakkortuumillu pilersitserusussusermik pilersitseqataapput.
- Qallunaat tatiginnittuunerat inuiaqatigiinnik atugarissaarfiusunik ingerlatsisoqarneranik aallaaveqanngilaq - kisianni inuiaqatigiinni atugarissaartuuneq aamma tatiginnittuunermik aallaaveqarpoq, Gert Tinggaard Svendsen oqarpoq.
Kalaallit Nunaanni inuit amerlanerpaat tatigaagit? Sooq imaluunniit sooq naagga? Naqqani isummersornermi peqataagit.