Akerliussutsimik takutitsisut anorersuarmi
’Peqatigiiffik 16. august’, avatangiisinik illersuiniaqatigiit Nuup Kangerluata Ikinngutai aamma Avataq ataasinngornermi suliniutit angisuut aamma Nuup Kangerluani savimminissiorfissamik pilersaarut pillugit akerliussutsimik takutitsiffigai
Ataasinngornermi ualikkut sila ajoraluaqisoq anori sakkortulluni, aqquserngit quatserlutik siallilaannguartoq Nuummi innuttaasut 20-nit amerlanerit aatsitassat pillugit inatsit aamma Nuup Kangerluani savimminissiorfimmik pilersaarut akerliussutsimik takutitsiffigaat.
- Naak silarlulluni aqquserngit qillariinnanngorlutik quatsersimagaluartut takkuttoqarluarpoq. Soorunami amerlanerusinnaagaluarput, suliniuteqartoq Jan Hansen 'Peqatigiiffik 16. august' siulittaasua oqarpoq, taakkua aatsitassanut inatsimmik aamma suliniutinut angisuunut inatsit akerleraat.
- Akerliussutsimik takutitsinersi pissarsiaqarfigissavisiuk?
- Pissarsiaqarfigissanerlutigu apeqquterujussuaq. Kisianni demokraatiskimik ingerlatseriaaseqarnermi inooqatigiinneq pillugit pisussaaffiit aamma pisinnaatitaaffiit ilaapput taamaattumik uagut tatisimaneqarnata oqaaseqarsinnaatitaanerput aallaavigalugu katersuuppugut isummatsinnillu saqqummiilluta, Jan Hansen Sermitsiaq.AG.'mut oqarpoq.
Akerliussutsimik takutitsisoqarmat Naalakkersuisunut ilaasortaq ataasiinnarluunniit innuttaasunik naammagittaalliortunik alakkaanngilaq. Iluatungaani Inatsisartunut ilaasortat ataasiakkaat nuisaput ilaatigut Karl Lyberth Siumut.
Jan Hansen akerliussutsimik takutsitsineq sioqqullugu oqarpoq neriuutigalugu inuit ikinnerpaamik 100-t peqataassasut.