Skip to main content

Narsami inuusuttunut suliniut ammarneqartoq

Tallimanngornermi Narsami Piareersarfiup immikkoortortaa pisortatigoortumik ammarneqarmat Kommune Kujallermi kommunalbestyrelsi borgmester Simon Simonsen siuttoralugu peqataapput

Tallimanngornermi ualikkut Kujataani inuusuttunut sannavik nutaaq Eskimopelsip illutarisimasaani ammarneqarpoq.

Immikkoortortaq nutaaq sannavittut amernillu mersortarfittut aaqqissuunneqarsimasoq qanga Eskimopelsiusimasup illutarisimasaani ammarneqarpoq, illu 2009 kommunimit ingerlanneqarlerpoq. Amernik kavaajaliorfiunngikkallarami ukiorpassuarni pequsiorfittut sannavittullu atuuppoq, taamaattumik oqartoqarsinnaavoq illu sananeqarnermini siunertaminut utertinneqartoq. 

Simon Simonsen, Kommune Kujallermi borgmesteri ammaanermini illoqarfik aamma inuusuttut Piareersarfiup sannavianik nutaamik pilluaqquai. Tamatuma kingorna Inuussutissarsiornermut suliffissaqartitsinermullu ataatsimiititami siulittaasoq Kalistat Lund oqaaseqarpoq. 

Taassuma oqaatigaa immikkoortortaq nutaaq inuusuttut namminneq Inusullivimmik atsersimasaat nunap immikkoortortaani sanaartornermik aamma pinaveersaartitsinermik ilinniarfittut atuutissasoq, tamaani inuusuttut qisunnik sulinermik, iluarsaasinernik aamma aserfallatsaaliinernik kiisalu atoqqitassanik sullissinernillu misileraaffigissavaat. 

Upernaamut pilersaarutigineqarpoq naasulerineq aamma nunalerineq ingerlanneqalissasut.

Siunertarineqarpoq inuusuttut ilinniaqqinnissaminnut nalornisut ilinniarfiit nalinginnaasut avataasigut periarfississallugit, aamma perorsaanermi anguniarneqassasoq ullut suliffittut nalinginnaasutut sapinngisaq tamaat ingerlanneqarnissaat, ullaakkut aalajangersimasumik takkuttarfeqarnikkut, sulianik ingerlatsinikkut atuartut ataasiakkaat siunissami suliffeqalernissaannut misilittagaqalersillugit. 

Tamanna neriuutigaarput kissaatigalugulu, Kalistat Lund nangippoq, illoqarfitsinni suliffeqarfiit aamma inuussutissarsiortut pitsaasumik suleqatiginissaat, taamaaliornikkut inuusuttut inuunermi piviusumi pisinnaasaminnik atuinissaat periarfissaqaqqullugit. Kommune Kujallermi ilinniartitaaneq aamma pikkorissarneq pingaartinneqaqaaq siunissami inuussutissarsiutaalerumaartussat piginnaanernik amerlasuunik pisariaqartitsimmata. Inuusuttunut suliniut kommunip inuusuttut sapinngisamik amerlanerpaat ilinniakkamik suliffimmillu ingerlatsinissaannut iliuuserisaata pingaartut ilagaat. 

Oqaatsit taakku atorlugit Kalistat Lundip inuusuttunut suliniut ammarpaa.

Inusullivik, sannavittaani ulluinnarni aqutsisutut Vittus Nielsen atorfinitsippaat aamma Karla Bidgaard suliniummut pisortatut ingerlavoq.

Illumik pisineq, kuuffilersuineq, allanngortiterineq aamma iluanik aaqqissuussineq 600.000-niit 700.000-nut akeqarpoq, inuussutissarsiornermut pisortaqarfik 400.000 koruunit missaannik tapiissuteqarluni. Tamatuma saniatigut inuusuttup suliap ilarujussua namminneq isumagaat. 

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER