Imatut Danmarki akulerutsinneqassaaq
Kalaallit Nunaanni suliffissuaqarnikkut ineriartortitsinissami qallunaat ingerlatsiviisa qanoq isilluni akulerutsinneqarsinnaanerannut isumassarsianut katalogimik Kuupik Kleist Villy Søvndalilu suleqatigiinniarput
Kalaallit Nunaannut tikeraarnermini qallunaat nunanut allanut ministeriat Villy Søvndal, SF, Naalakkersuisut siulittaasuannut Kuupik Kleistimut, IA, siunnersuuteqarpoq Kalaallit Nunaata ineriartorteqqinneqarneranut qallunaat ingerlatsivii qanoq isilluni akulerutsinneqarsinnaanersut.
Nunanut allanut ministeri tikeraarnermini taamatut Sermitsiamut paasissutissiivoq. Siunnersuutilli suunersut Villy Søvndalip tamanut oqaatigiumanngilaa.
Kuupik Kleist aamma nammineq siunnersuuteqarpoq. Piffissami aggersumi nunanut allanut ministeri Naalakkersuisullu siulittaasuat atorfilittaallu isumassarsianut katalogiliorniarput, qanoq isilluni qallunaat ingerlatsivii aningaasaliissuteqartarfiilu nunatta aatsitassaataanut ineriartornissamullu periarfissanut allanut aningaasaliissuteqartinniarneqarsinnaanersut.
Kalaallilli Nunaat aalajangiissaaq, tassa qallunaat akulerutsinneqarnissaannik kissaateqartoqassammat, Villy Søvndalip tikeraarnerani oqartoqarpoq.
Issittumi ineriartorneq Kalaallillu Nunaannik suleqateqarneq pillugit Villy Søvndalip qanoq isumaqarnera Sermitsiami tallimanngormat saqqummersumi atuaruk, taannalu pisiarisinnaavat ataani.