Skip to main content

Villy: Nammineq aalajangissavarsi

Sulisartut nunat allamiut Kalaallit Nunaanni qanoq akissarsiaqartinneqarnissaannut Danmarki akulerunnianngilaq, qallunaat nunanut allanut ministeriat oqarpoq. Akerlianilli aatsitassat qaqutigoortut naalagaaffiup oqartussaaffigigai oqaatigaa 

Sulisartunik nunat allamiunik Kalaallit Nunaanni akissarsiaqartitsineq nunat tamalaat isumaqatigiissutaannik unioqqutitsinngippat Danmarki tamatumunnga akuliukkumanngilaq, nunanut allanut ministeri Villy Søvndal, SF, KNR-mut oqarpoq.

- Naamik, tamatumunnga akulerunnianngilagut. Kalaallit oqaluuserissavaat qanoq atugassaqartitsisoqassanersoq. Isumaqarpunga pingaaruteqartoq oqaatigissallugu pissutsit imaatsillugit, kikkut tamarmik naatsorsuutigalugu sulisartut nunat allamiut amerlanerulissasut, taava tamatumunnga malittarisassiortoqassasoq. Malittarisassatigulli qanoq atugassaqartitsisoqassanersoq kalaallit oqaluuseissavaat, Villy Søvndal Radioavisimut oqarpoq.

Sioqqutsinianngilaq
Suliniussuarnulli inatsisissaq taamatut isikkoqarluni akuersissutigineqassappat qallunaat nunanut allamiunut inatsisaannut akerliussaaq, tappavani najugaqarnissamut taamaallaat akuersissuteqartoqartarmat akissarsiat sulinermilu atugassarisat qallunaat nunaanni pissutsit atorneqartut malinneqarpata.

Tamatumanilu Villy Søvndal ersarissumik qulakkeerinninnianngilaq immikkut inatsisiliortoqassappat taanna folketingimi qanoq isumaqarfigineqassanersoq:

- Danmarkimi inatsisiliortoqassappat tamanna siumut isummersorfiginianngilara. Oqallinneq Kalaallit Nunaanni ingerlanneqassaaq, taavalu kingorna misissussavarput qallunaat inatsisaannut kinguneqassanersoq, Villy Søvndal oqarpoq.

Naalagaaffiup suliassaa
Villy Søvndal taamatut oqarpoq ippassaq Naalakkersuisut siulittaasuannut Kuupik Kleistimut, IA, pulaarnermi kingorna.

Taakkua marluullutik aamma isumaqatigiissutigaat Kalaallit Nunaanni aatsitassat qaqutigoortut suleqatigiissutigineqassasut, aatsitassanut oqartussaaffik Kalaallit Nunaata tigusimagaluaraa.

- Tamanna Kunngeqarfiup Danmarkip nunanut allanut isumannaatsuunermullu politikkianut pingaaruteqarsinnaavoq. Taamaasilluni aatsitassanut qaqutigoortunut apeqqutit arlallit naalagaaffiup suilassarilerpai, nunanut allanut ministeri KNR-mut oqarpoq.

Kuupik Kleistillu akunnattoorfik akuersaarpaa:

- Qularnanngilaq aatsitassanut akisussaaffik tigusimagaluarlutigu Kunngeqarfik Danmarkimi ataqqisassaqarpoq sunnerneqarsinnaasunik. Taamaattumik Villy isumaqatigaara oqaloqatigiinnissarput pisariaqartoq - immaqa manna tikillugu oqaloqatigiissimanitsinnit annertunerujussuarmik, Kuupik Kleist oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER