Tuniniaaneq ingerlalluarpoq
'Qaqqat Alanngui'-nut tunuliaqutaasut pakasarneqarput. Dvd-t Blu-rayillu amerlanerit tikisinneqalerput
- Sinerissami tamarmi nungulluinnarsimapput. Aasianni dvd-t blu-rayillu akunnerup aappaata affaata ingerlanerinnaani nungupput, ullorlu taannna pisiniarfiit tamarmik siarngupput amerlanernillu inniminniillutik, Aká Hansen filmimut qiiaamminartuliamut 'Qaqqat Alanngui'-nut nuannarineqarluartumut tunuliaqutaasumit Tumit Productionimeersoq oqaluttuarpoq.
Dvd-nik blu-rayinillu novembarip 16-iani tuniniaalernissamut qassinik naqiterisitsisoqarsimanersoq Tumit Productionimit ilisimatitsissutigineqanngilaq. Filmimulli tunuliaqutaasut juullimut niuffannermut ilaarusupput taamaattumillu amerlanernik inniminniillutik.
Mianersorsimasut
- Tunumi soqutiginnittut filmimut pisiassamut aamma qilanaarsinnaapput. Tunumut nassiussivugut. Danmarkimi nioqquteqarneq suli aallartinngilaq, kisianni aamma nassiussivugut, Aká Hansen oqarpoq.
Pisiniarfiit inniminnersimasaasa saniatigut Tumit Production toqqortaateqalaarsimagaluarpoq, Taakkuali aamma nungulluinnarneqarput. Nuummi pisiniarfiit arlaqanngitsut kisimik filmimik suli nioqqutissaateqarput.
- Filmip nioqqutigineqarneranut soqutiginnittut amerlasoorujussuunissaat takorloorsimanngilisiuk?
- Naamik, tassami dvd-p 'Hinnarik Sinnattunilu' nioqqutiginissaa ajornartorsiutigisimavarput. Inunnit assilillugu immiunneqaqattaarsimavoq. Suliarineqartunik assiliinnginnissamik paasisitsiniaanerput iluaqutaasimanersoq naluara. Kisianni nioqquteqarnerput ilimagisamit ingerlalluarnerujussuuvoq.