Uranimik qalluisinnaavugut?
Uranimut akuersaanngilluinnarnermut politikkip sakkukilliimisinneqarnissaanut naalagaaffeqatigiinneq akornusiisinnaava? Tamanna suleqatigiissitamit immikkut ilisimasalinnik inuttaqartumit qulaajaavigineqassaaq. Suliaq arriippallaaginnarsinnaavoq, Siumut isumaqarpoq
Uranimik qalluisinnaanermut Kalaallit Nunaata akuersissuteqarnissaanut Danmark pinngitsoortitsisinnaava? Apeqqut tamanna apeqquterpaalussuarnut immikkut ilisimasalinnik suleqatigiissitamit suligasuartussamit akiniarneqartussanut ilaavoq.
Inatsisartuni inuussutissarsiornermut ataatsimiititaliaq isumaqatigiissoq naalakkersuisunut peqqusivoq suleqatigiissitaq immikkut ilisimasalinnik inuttalik kingusinnerpaamik upernaaru nalunaarusiamik akuersaanngilluinnarnermut politikkip sakkukilliimisinneqarnerata nassataanik nunarsuarmi politikkimut tunngasunik tigussaanerusunillu qulaajaaffiusumik saqqummiussissasoq.
- Naalakkersuisut isumaqarput, nalunaarusiaq taama ittoq misissuinernut ingerlareersunut tapertaalluarsinnaasoq, Inuussutissarsiornermut Aatsitassanullu naalakkersuisoq, Ove Karl Berthelsen, IA, akissuteqarpoq.
Taanna oqaluttarfimmiit ilisimatitsivoq sananeqaatit qinngornernik ulorianartunik akullit pillugit inatsisit nunanilu tamalaani isumaqatigiissutit suut Danmarkimut atuunnerannik malittarisassallu suut Kalaallit Nunaannut atuunnerannik Danmarkimi qitiusumik aqutsisoqarfik qulaajaaleruttortoq - ilaatigut qalluinermut, suliarinninnermut, toqqortarinnermut, niuerutiginninnermut siammartiterinnginnissamullu malittarisassanik.
Ove Karl Berthelsenip Canadami sumiiffimmut ullumikkut uranimik qalluiffiusumut paasisassarsiorluni angalasimanini ilanngullugu oqaatigaa.
Siumut kisimi aalajangiisinnaagaluaruni uranimut akuersaanngilluinnarnermut politikki oqaluttuaannanngoreersimassagaluarpoq. Tassannga inassutigineqarpoq, Kalaallit Nunaanni aatsitassanut 'qallorneqarsinnaasutut akuerisaasunut' tamanut uranip akuata 0,1 procentimut qaffasinnerpaaffilerneqarnissaa piaarnerpaamik eqqunneqartariaqartoq.
- Akuersaanngilluinnarnermut politikkimit ingerlariaqqittariaqarpugut. Aalajangiinissamut piffissanngorpoq. Uninngaannarnermit ingerlariaqqinnissamut piffissanngorpoq. Siumut pimoorullugu isumaqarpoq, aatsitassanik uranimik akulinnik piaanissamut qalluinissamut akuersissuteqarnissaq pisariaqartoq. Naatsumik oqaatigalugu akuersaanngilluinnarnermut politikkip atorunnaarsinnissaanik Siumut kissaateqarpoq. Naalakkersuisut upernaakkut ataatsimiinnermi saqqummiussinissaat pissangalluta utaqqiniarparput. Qulartut qularunnaarnissaat neriuutigalugulu qilanaaraarput, Karl Lyberth, Siumut, oqarpoq.