Kullorsuaq 'Pajuttaammit' annaanneqarpoq

Kullorsuaq naatsorsuutigisinnaasaraluamisut Roayl Arctic Linellu pajuttuinissamik pilersaarutani takuneqarsinnaagaluartutut piffissami sivisuumi nioqqutissanik pajunneqarsimanngilaq.

RAL-ip Savalimmiormiut umiarsuaat Nordkyn attartorpaa, taannalu nunaqarfimmut pajuttarppoq. Umiarsuarli talittarfeeqqamut talissinnaanngimmat umiarsuup prammia kranitalik atorneqarpoq. Kraniali aserorsimammat Savalimmiormiut umiarsuaata naatsiianik, immunnik nioqqutissanillu ulluinnarsiutinik pisariaqartunik allanik innuttaasunullu nassiussanik poortukkanillu usilluni aallaqqiinnartarnera nunaqarfimmiut 400-t aasarli tallimariarlutik misigisarpaat.

Marlunngornermi novembarip 13-iani silagippoq pilersaarutillu malillugit Nordkyn Kullorsuarmut tikittussaavoq.

Nunaqarfimmiut kiisami pilersaarutit eqqorlugit nioqqutissanik amigaatitigneqartunik kiisalu poortukkanik nassiussanillu utaqqineqartunik pajunneqarnissartik neriuutigilerpaat. Umiarsuup utileruni aamma nassataqarsinnaanissaa soorunami neriuutigineqarpoq.

- Kisianni pajunniaraluarneq iluatsinngitsooqqippoq, Søren Greve oqaluttuarpoq.
- Unnuup novembarillu 14-iata unnuaata ingerlanerani prammip krania ajoquteqaqqilerpoq taamalu nassiussat amerlanerpaartaasa nioorarnissaat taamaatiinnarneqarluni. Umiarsuaq kingumut kujammut aallarpoq.

Royal Arctic Linep nittartagaani sisamanngornermi takuneqarsinnaavoq nunaqarfinnut pajuttuissutaasartoq aalajaatsoq Pajuttaat Kullorsualiartussanngortinneqarsimasoq novembarip 19-iani tikittussanngorlugu. Pajuttaat talittarfeeqqamut talissinnaavoq kraninilu atorlugit usingiarsinnaalluni.

Nunaqarfiup pilersorneqarnera aasarli ajorluinnarsimavoq, nunaqarfimmiut oqaluttuarpoq.

Pilersuisup pisiniarfiani inuussutissat ikittuinnaasut

- Pilersuisumi inuussutissaqalaarsimavoq. Kisianni umiarsuup tikinnissaraluanik arlaleriarluni taamaatitsiinnarnerit prammillu ajoquteqarnera pissutigalugit pisariaqavissunik arlaleriarluta nunguutsisarsimavugut, atuarfimmi sulisoq Søren Greve oqaluttuarpoq.

- Nunaqarfik nioqqutissanik nassataqarlutik tikittartunit ikiorneqarpoq. Taamaattumik ilaatigooriarluni inuussutissanik nioqqutissaqalaartarpoq, nunaqarfimmiut oqaluttuarput.

Pajuttaalli iluaqutigalugu pisiniarfiup nioqqutissanik imaqaqqilernissaa neriuutigineqarpoq.

- Nioqqutissanik pisariaqartunik soorlu naatsiianik, qallersuutinik, qajuusanik allarpassuarnillu qaammatini arlalinni amigaateqartaratta tamanna maanimiunut kipiluttunartorujussuusimavoq. Immunnik tunisassiat nungussimapput, Søren Greve oqarpoq.

- Sikuunerata nalaani taamaattoqarnissaa ilimagineqarsinnaavoq, kisianni aasarli angallaffiuleraluarpoq, kisiannili taamaattoqarneranik misigisaqarsimanngilagut, oqarpoq.

Ukioq manna »pilersaarutit« malillugit Kullorsuarmut tikittoqaqqinnissaa Royal Arctic Linep nittartagaani takuneqarsinnaavoq: Tassalu decembarip arferngani, tamatumuunalu Nordkyn misileeqqissaaq. Apeqqutaavorli nioqqutissat sikuunerata nalaani decembarimiit 2013-imi juunimut nunaqarfimmiunit inuussutigineqartussat tamakkerlugit nioorarneqarsinnaassanersut, tassa pajuttup tikinnissaanik pilersaarut iluatsissappat.

Nordkynimik nunaqarfiullu prammianik maannamut misilittakkat pitsaavallaanngillat. Aamma apeqqutaavoq Nordkyn nioqqutissanik innuttaasut 400-t qaammatini arfinilinni atorfissaqartitaannik naammattunik nassataqarsinnaassanersoq.

Søren Greve oqarpoq, ukioru pilersorneqarnermut tunngasut qanoq innissaat nunaqarfimmiunit ernummatigineqartoq.

Pilersuineq pitsaanngitsoq pillugu arlallit Royal Arctic Linemut Pilersuisumullu naammagittaalliorsimapput. Kinguaattoornerit Royal Arctic Linemit ajuusaarutigineqarput.

- Innuttaasut naammagittaalliornerat paasilluarsinnaavarput, paasissutissiisartoq Jakob Strøm oqarpoq.

Taanna ilisimatitsilluni oqarpoq Nordkyn tullianik prammimik immikkut nassataqassasoq nioqqutissat sikuunerata nalaani pigineqartussat tamakkerlugu nioorarneqarnissaat qulakkeerneqarsinnaaqqullugu. Ajornartorsiutinik pilersoqassagaluarpat Pajuttaat atorneqaqqittariaqassaaq, Jakob Strøm neriorsuivoq.

Pilersuisoq ajuusaarpoq

Kullorsuarmi nioqqutissanik pilersuinerup ajornera Pilersuisup pisortaata Frederik Olsenip aamma ajuusaarutigaa.

- Umiarsuit qanoq innerannik ernummateqarnera Royal Arctic Linemut aamma namminersorlutik oqartussanut nammineq oqaatigaara. 2013-imut aamma ernumavugut Royal Arctic Linep umiarsuassai utaqqisitsimmata, Frederik Olsen oqarpoq nangillunilu:

- Pajuttut tikittannginnerannik nioqqutissallu kiffartuussinissamut isumaqatigiissummut ilaasut amigaatigineqalersinnaasut pillugit namminersorlutik oqartussat ilisimatittarpakka, Frederik Olsen oqarpoq.

Allaaserisat allat atuakkit takullugulu Qaasuitsup Kommunia susoqarnersoq. Tamanut Avannaani matumani akeqanngitsumik aasinnaavat: