- Aningaasatigut napatissinnaalernissaq qaqugorsuaq

- Kalaallit Nunaanni ullumikkut nammineq napatittumik aningaasarsiorneq ingerlanneqanngilaq, inuuniarnikkut atugassarititaasut eqqarsaatigalugit Danmarkimit tapiissutinit aamma EU-mik isumaqatigiissutinik pinngitsuuisinnaanngilaq.

- Tunngaviatigut pisortat aningaasanik ingerlatsinerat naammaginarpoq kisianni pisortat aningaasaqarneranni ungasinnerusoq eqqarsaatigalugu ajornartorsiuteqarpoq suli aaqqinneqanngitsunik. Nunani allanisuulli utoqqaat amerliartornerat inuussutissarsiortuniit naleqqiullu ersareqaaq. Pisortat isertitaat - maannakkutut inuussutissarsiorneq akileraartarnerlu inissisimatillugit - aningaasartuutinut malinnaasinnaanngillat.

Taamak allapput Torben M. Andersen aamma Ulla Lynge, Kalaallit Nunaanni Aningaasaqarnermut Siunnersuisooqatigiinni siulittaasoq siulittaasullu tullia, Kalaallit Nunaanni pissutsit Berlingskemi allaaserigamikkit.

Kalaallit Nunaanni Aningaasaqarnermut Siunnersuisooqatigiit naliliipput 2012-imi aningaasat ingerlaarnerat apparsimasoq, 2013-imi aningaasatigut siuariaatitut naatsorsuutigineqartussaq annikitsuinnaassasoq.

Imermik nukissiorfiit aatsitassallu aqqutissaapput

- Politikki nikisinneqanngippat isertitat aamma aningaasartuutit taamaaginnartumik assigiinngissuteqarnerat ersikkiartussaaq, agguaqatigiissillugu 2014-p tungaanut ukiut tamaasa milliardip missigissavaa. (Assigalugu BNP'p 7-8 procentia). Taamannak ingerlaannartoqarsinnaanngilaq, allanngortiterisoqanngippat aningaasatigut ineriartorneq aalaakkaasuunavianngilaq.

- Inuussutissarsiornermi ineriartortoqarnissaa pisariaqarluinnarpoq taamaaliorluni imminut napatittumik aningaasarsiornissaq qulakkeerniarneqarsinnaassaaq. Tamanna taamaalaat aaqqissuunneqarsinnaavoq pinngortitamit isumalluutit soorlu imermik nukissiorfiit aatsitassallu atorluarneqarnerisigut, Kalaallit Nunaanni Aningaasaqarnermut Siunnersuisooqatigiit tutsiupput.